رامي صبري عن تقليده لـ عمرو دياب: «كنت بسمع الكلام من بعيد واتضايق»

تحدث المطرب رامي صبري، عن تشبيهه بالهضبة عمرو دياب، في بداية مشواره الفني.

وأوضح رامي صبري، في تصريحات تليفزيونية، قائلاً: "أنا كنت بسمع عمرو دياب، ولما بدأت في الظهور قالوا ده بيقلده وكنت بسمع الكلام من بعيد واتضايق، واقول هم بيعملوا كده ليه؟، طب هو أنا فعلاً بقلده؟، طب هو أنا شبهه؟، يمكن أنا متأثر به وأنا مش عارف!، مهو برضه عمرو دياب جيل تاني مش جيلي، وحتى لو أنا شبهه في حركة عادي مش أزمة".

وأضاف رامي صبري قائلاً: "أول فترة كنت بشغل فيها اللي هي أول 5 سنين بقيت أخلي بالي اوي، لو في حاجة في ايدي بنزل ايدي في الكليب، لحد ما حسيت أن الناس بدأت تهدى في الموضوع ده، والناس مكنتش عارفاني في الأول هو ده حقيقي ولا شوية وهيمشي مش عارفين، فكنت دائمًا بركز اوي في الأغنية".

وأشار رامي صبري قائلاً: "وأنا بسمع المزيكا بقول لأ دي مش هتنفع شبه حاجة لعمرو دياب، وبدأ في الألبوم التالت والرابع ودلؤتي في الألبوم التاسع، وبقيت بركز اوي في الموضوع ده، مش هقولك أنه عقدة، لكنه في الأول الجمهور حاطتني مع المطرب رقم 1، وفي ناس بتجتهد وبتدفع فلوس عشان صورتها تتحط جانب صورته".

وقال رامي صبري: "بقيت اطبطب على نفسي واقول : يا ابني أنت مجنون.. أنت زعلان عشان بتتقارن مع عمرو دياب، آه زعلان عشان محبش حد يقول أني بقلد حد، وبعد مسيرة 17 سنة في الغناء والحفلات في مصر والوطن العربي، لما حد لسة يقول أني بقلد عمرو دياب يبقى عنده مشكلة".