رانيا يوسف: «بفضل ضل الحيطة عن الراجل.. وأنا والفيشاوي لايقين على بعض»

ياسمين حمادة 31 ديسمبر 2022 | 10:10 مساءً

كشفت الفنانة رانيا يوسف حقيقة زواجها من الفنان أحمد الفيشاوي، وعلقت على صورتهما الأخيرة احتفالًا بالكريسماس في كواليس فيلم ورد ريحان.

تصريحات رانيا يوسف

قالت رانيا يوسف في تصريحات تلفزيونية لها، إنها إنسانة بسيطة وتزوجت دون شبكة بمبالغ كبيرة، معلقة: «أنا بفضل ضل الحيطة عن ضل الراجل، وعمري ما هتجوز واحد سي السيد، وزي ما الراجل جواه طفل أنا كمان جوايا طفلة».

وأضافت رانيا يوسف : «الراجل الحلو شكلًا دا بيكون من برا بس ولكن في الحياة والمسئوليات الموضوع بيختلف، وبحس الرجالة بيخافوا مني وبيغيروا وبيتضايقوا لو بقيت مستقلة ماديًا لأنهم عايزين أفضل معتمدة عليهم، وأنا لما بتجوز واحد مش محتاجة له ماديًا بكون محتاجة له عاطفيًا».

واستكملت الفنانة رانيا يوسف كلامها: «ويكون لي سند في الحياة، وكلامي دا عن تجربة 3 جوازات و2 مشروع جواز، والرجالة بيكونوا ملايكة أول 3 شهور وأول ما بتيجي سيرة الجواز وأننا هنكتب الورق بيتحول لـ وحش، وأنا ممكن أسامح الراجل مرة ولكن في التانية لأ وحسب الغلطة اللي عملها».

رانيا يوسف

رانيا يوسف وأحمد الفيشاوي

قالت الفنانة في تصريحاتها: «وأنا إنسانة بسيطة وأقل واحدة بتلبس ماركات وألماظ ولكني بهتم ألبس بشكل لائق، ومجاليش شبكة بملايين في جوازاتي التلاتة، وأنا ممكن أكون ست بمليون راجل وأتحمل المسئولية والجواز سهل بس لازم أعرف هتجوز مين؟ وهل هيتقبل ظروف حياتي؟».

وتابعت: «بخاف من الحسد ونجمي خفيف لأن أقل حاجة بعملها الناس بتكون مركزة معايا، وهي ميزة إن الناس طول الوقت تكون حريصة إنها تشوفك وتتابع أخباري، بس الناس مش بتركز على شغلي قد ما بيركزو على إن بلبس ايه، ومقتنعة بمقولة القالب غالب وإحنا لازم نكون مهتمين بلبسنا وجسمنا عشان إحنا قدوة للناس».

وقالت عن انتقادات صورتها مع أحمد الفيشاوي: «الناس طلعت شائعات إني هتجوز أحمد الفيشاوي بسبب الصورة، وإحنا لايقين على بعض بس أنا مش ناوية أتجوز، وأنا وأحمد بنعمل فيلم وكنا بنقرأ السيناريو في الصورة».

أحمد الفيشاوي ورانيا يوسف

إطلالات رانيا يوسف

وفيما يخص إطلالاتها الجريئة، علقت رانيا يوسف قائلة: «طول عمري بلبس مايوه وشورت.. أنا مبتغيرش عشان أراضي حد أنت مش عاجبك رانيا متتابعنيش».

واستكملت: «أنا أقل واحدة بلبس ماركات وأنا بشتغل على جسمي وشكلي فأقل حاجة بلبسها بتبان حلو، وممكن أهتم بالمركات بس في المهرجانات، أنا ست بحب الجمال في الرجالة والستات وبتعلم من البنات الشباب استياليتهم الجديدة».

قالت رانيا يوسف أيضًا: «الراجل بيفتكر إن الصوت الواطي والأدب ضعف مني وبيتفاجئ بلطشة قلم على وشه بإننا هنتطلق ودلوقتي، أنا بعدي مرة وبنبه وخلي بالك كدة أوفر وبمنتهى الأدب وبيفتكر إني هعدي وبعدها بيتفاجيء إننا هنطلق، والطلاق بيوجع الواحدة وبتلجأ انها تبين إنها عادية عشان متحسسش الراجل بكسرتها».

خلاف رانيا يوسف وغادة عبد الرازق

وأضافت رانيا يوسف: «أنا ممكن أكون بمليون راجل لأني بشتغل من وأنا 16 سنة وشايلة مسئوليات واتعودت أصحى الصبح أعمل كل حاجة، ومش مستنية حد يعمل لي حاجة، وكنت أتمنى أكون مدلعة، ولكن الدلع فيه عيوب بردو لأن لو الشخص اللي معتمدة عليه دا راح الدنيا هتقع».

وقالت أيضًا: «بحمد ربنا أن محدش فاكر مشكلتي مع غادة عبد الرازق، لأني بنسى أي حاجة وحشة وشخصية متفائلة، وبفرض حسن النية في اللي قدامي، وغادة لها رصيد عالي عندي وبينا عشرة».

واختتمت: «ومش بنتفاهم على المستوى الفني ولكن أهدافنا واحدة على المستوى الإنساني وهي أصلها طيب وكريمة وست جدعة، وأحنا اتصالحنا من السوشيال ميديا لأننا بنعمل لبعض لايك ودايما بندعي لبعض ونتمنى الخير لبعض، واتقابلنا من فترة».

رانيا يوسف وغادة عبد الرازق