رحمة حسن: كلب عضني في الشارع والجرح بينزف وأنا خايفة

أعلنت الفنانة رحمة حسن، تعرضها لحادث عقر من قبل كلب، خلال تواجدها في أحد الشوارع القريبة من منزلها، قائلة: «امبارح الساعه ١١ بليل كنت نازله اجيب حاجه من السوبر ماركت جمب البيت ،وكنت ماشيه علي الرصيف وكان في عربيه بتركن جمبي عادي ، فجاه الباب اتفتح ولقيت كلب (جيرمن شيبرد) تقريبا مَش متاكده اوي ، بيهجم عليه بكل قوته».

وتابعت عبر منشور لها على حسابها عبر مواقع تبادل الصور والفيديوهات انستجرام، «طبعا حاولت أجري لكن للأسف الكلب كان قوي وشرس ووقعني علي الأرض، حاولت أقوم وأجري وصاحبته حاولت تشده، بس فك الليش بتاعه وعضني عضة كبيرة وغويطه بنابه».

وأضافت: «صاحبه الكلب كتر خيرها أخذتني فورًا علي مستشفي إمبابة، ادوني حقنه تطعيم الكلب ولسه فاضلي ٤ هاخدهم خلال شهر، بس المشكله ان من امبارح الجرح بينزف دم كتير ،وانا طبعا خايفه ومصدومة».

واستكملت الفنانة رحمة حسن حديثها: «تعبانة وعندي تروما من أمبارح، والي واجعني أكتر أني مَش عارفه أتصرف إزاي، خصوصا أني أكيد مَش عايزة الكلب يتأذي، بس كمان مَش عايزه أي إنسان كمان يتأذي ويتعض ويتبهدل في الشارع زيي».

وواصلت كلامها «أنا كنت بشوف الكلب ده دائما مع صاحبته بتمشي بيه في الشارع جمب البيت عندي، وعشان شكله شرس كنت بأمشي بعيد عنه لما بشوفه، أمبارح صاحبة الكلب قالتلي متخافيش هو عض ولادي قبل كدا وتمام محصلش حاجه».

وأوضحت رحمة حسن: «طبعا انا اتصدمت لما عرفت انها مَش اول مره الكلب يعض حد ومع ذلك هي سايباه عادي في الشارع منغير كمامه او حد قوي يمسكه .. بجد حرام عليكم ، الكلب لما بيكون حجمه كبير وشرس بيعتبر سلاح ،وصاحبه مسؤل مسؤليه كامله عنه ويحاسب علي اهمال مسؤليته ، خصوصا لو اهماله تسبب لشخص تاني في اذي بدني يحتاج اكتر من ٢١ يوم علاج واذي نفسي ماعرفش هايحتاج قد ايه عشان يخف».

واختتمت: «أنا كنت بحب أنزل أحط أكل ومياه للكلاب والقطط تحت البيت، دلوقتي أنا حقيقي مرعوبه أقرب منهم وخايفة جدا، أنا أسفة طولت عليكم بس أنا بجد مَش عارفه المفروض أعمل أيه عشان محدش تاني يتأذي».

رحمة حسن توضح تفاصيل خلافها مع المنتج هاني أسامة : «كنت بطلب حقي وبيتهرب»

رحمة حسن تتصدر التريند بعد شكواها ضد هاني أسامة .. وفنانون« لينا فلوس عنده»