ريهام عبد الغفور: «ابتعادي عن السينما مش باختياري ولما بيتعرض عليّا حاجة مناسبة بعملها»

أعربت الفنانة ريهام عبد الغفور عن سعادتها الكبيرة بالتكريم الذي حظيت به في مهرجان الإسكندرية للفيلم القصير، مؤكدة أن التكريم دائمًا ما يكون بمثابة تقدير يفرح الفنان.

وقالت خلال لقائها على هامش المهرجان: "انبسطت جدًا طبعًا، أكيد التكريم بيبقى تقدير، فأي تقدير بيفرح أي حد، خصوصًا الفنان. وبشكر جدًا أهل إسكندرية، وشهم دايمًا حلو عليّا".

وعن علاقتها بالأفلام القصيرة، كشفت ريهام عبد الغفور عن حبها لهذا النوع من السينما، قائلة: "على فكرة، عملت أكتر من فيلم، بس هو الفيلم 'واحدة كده' كان حاجة قريبة، إنما أنا زمان أول ما ابتديت عملت أفلام قصيرة كتير وبحبها، وبعدين كنت من لجنة تحكيم في مهرجان القاهرة السينمائي الدولي في الأفلام القصيرة، فالـExperience دي إدّتني فرصة إن أنا أتفرج على أفلام قصيرة كتير جدًا، فبقدّر الأفلام القصيرة جدًا".

وفيما يتعلق بأعمالها الجديدة، تحدثت ريهام عن مشاركتها في فيلم كوميدي جديد، قائلة: "تجربة بحبها وخايفة منها ومبسوطة بيها، وهشام ماجد بني آدم وفنان عزيز على قلبي قوي، أستاذ خالد دياب، وشيرين دياب من اللي كتباه، ومع مجموعة مصطفى غريب، وحاتم صلاح، وناس أكيد أنا بحبهم قوي كلهم، فمبسوطة إن أنا هبقى معاهم".

وتطرقت ريهام عبد الغفور للحديث عن ابتعادها النسبي عن السينما رغم موهبتها الكبيرة، قائلة: "لا هو مش باختياري، يعني هو لما بيتعرض عليّا حاجة مناسبة بعملها، بس أنا بطلت أعمل للتواجد وخلاص، فلما بتتعرض عليّا حاجة حلوة ما بتأخرش، بس هما ما بيعرضوش عليّا كتير السينما يعني، فربنا يسهل وإن شاء الله تبقى الفترة الجاية فيها أعمال حلوة، أيا كانت فين يعني عمومًا".

كما كشفت ريهام عبد الغفور، عن مشاركتها في فيلم آخر بعيد عن الكوميديا، مشيرة إلى أنه مختلف وصعب من نوعه، قائلة: "فيلم إخراج رامي الجندي وتأليف يوسف وجدي، وفي محمد ممدوح ضيف منوّر الفيلم، وأسماء أبو اليزيد عاملة دور عظيم، وهنادي مهنا كذلك، وإن شاء الله يعجب الناس. هو فيلم مختلف، وبطولة آسر.. أحمد حمدي، ففيلم مختلف، وأتمنى يعجب الناس بإذن الله".

وفي نهاية اللقاء، تطرقت الفنانة إلى أحد التعليقات التي أزعجتها مؤخرًا بشأن التنمر على السوشيال ميديا، قائلة: "أنا مش متضايقة ولا حاجة، هو كان يعني متضايقة وقتيًّا، انفعالية، عشان خوفًا على مشاعر ابني الصغير، خصوصًا عشان هو مبيحبش الحاجات دي، لكن تمام، أنا مش متضايقة ولا حاجة".