سبب بكاء الفنان فتحي سعد على الهواء.. إحباط وأزمة صحية صعبة

ظهر الفنان فتحي سعد يبكي على الهواء، ويكشف سبب غيابه عن الوسط الفني خلال الفترة الأخيرة بجانب أسرار من حياته.

تحدث الفنان فتحي سعد عن تعرضه لوعكة صحية خلال الفترة الماضية عبر تصريحات تلفزيونية، معربًا عن استيائه بسبب عدم سؤال أصدقائه عليه، بجانب توجيه الشكر للفنان مصطفى خاطر بسبب مساندته له في أزمته الصحية.

أزمة فتحي سعد الصحية

قال: «أنا جت فترة تعبت ودخلت المستشفى قعدت في الرعاية حوالي 15 يوم، النقابة وقفت معايا وعلى رأسهم الدكتور أشرف زكي، وفي فنانين وشباب نجوم طالعة بتوع مسرح مصر ومنهم مصطفى خاطر، لما عرفوا جولي المستشفى وعرضوا حاجات مادية».

وأضاف: «كنت فرحان أن جيل زي ده وقفوا معايا، هما جيل جميل ومجتش من ناس تانية أما المنتجين والمخرجين اللي هما معرفة، محدش سأل وزيي زي أي حد، لكن ربنا بعتلي شباب وعلى رأسهم مصطفى خاطر بالذات».

فتحي سعد

بكاء الفنان فتحي سعد

وأعرب الفنان عن استيائه بسبب عدم دعوته في أي من المهرجانات الفنية، كما كشف إصابته بالإحباط بسبب معاملة مساعد مخرج له، قائلًا: «الفنان الكبير العظيم حسن حسني قال كويس أنكم كرموتوني قبل ما أموت، وده فنان كبير وقام على كتافه كل فنانين مصر، ولما بشوف نوع من التكريم ومهرجانات السينما محدش بيبعت ليا كفنان، أومال هتبعتوا لـ مين؟».

واستكمل الفنان فتحي سعد قائلًا: «بشوف ناس في المهرجانات مالهمش علاقة بالفن، ومش عارف أعمل إيه علشان يعزموني ألبس فستان عريان؟، مش عايز أبقى قاسي على حد ولكن دي بنتدرج تحت باند المجاملات».

وروى موقف تسبب في إصابته بالإحباط، قائلًا: «لما تبقي رايح مكان عندك أمل وفرحان أنك رايح لـ زملاء وسعي علشان أشوف شغل، واتقابلت بـ جفاء وفي حد اللي هو مساعد مخرج مش عايز أقول قليل الذوق كلمني بعجرفة كأني ضيف غير مرغوب فيه، يا راجل أنا جاي للي مشغلك، وقالي لما يكون في فرصة هنبعتلك، وأنا موجهتش له أصلًا كلام وخرجت من عنده عندي إحباط، مش بعد العمر ده الواحد يتعامل بالشكل ده، الموضوع مأثر فيا لغاية دلوقتي».

واختتم باكيًا: «والمسألة تخصني أنا مش النقابة، يعني لو النقابة هي اللي كانت بعتاني كان ممكن أقول اللي حصل، لكن أنا كنت رايح لزملائي أبارك لهم، هما ردوا غبتي ولكن أنا مرضتش عليا كده وشركات الإنتاج مبيجبوش ناس عارفة تتعامل مع الفنانين، يعني المفروض يقولوا والله إحنا نتمنى حضرتك تشتغل معانا وأول ما يكون في فرصة هنبلغك، أي كلمة طيبة، صدقة حتى، ولكن ليه المعاملة بجفاء كده؟، الحق مش عليهم هما، الحق على الكاست الفني الحقيقي سواء المخرج أو المنتج».

فتحي سعد

فتحي سعد