سبب غياب ميرنا وليد عن الساحة الفنية

تحدثت النجمة ميرنا وليد سبب غيابها عن الساحة الفنية لفترة طويلة، مشيرة إلى أن الأعمال التي تعرض عليها لا تكون مناسبة.

ميرنا وليد تتحدث عن ذئاب الجبل

وقالت ميرنا وليد في تصريحات تلفزيونية: 'كل عمل بيبقى بظروفة يعني 'ذئاب الجبل' بعده على طول دخلت معهد السينما قسم إخراج، درست إخراج فبعدت عن التمثيل تماما، رغم أن الفترة دي كان لازم استغلها في التمثيل لكن لما بتاخدي قرارات مصيرية في السن الصغير مش دا السن الصح اللي تاخدي فيه قرار في حياتك العملية'.

واستكملت ميرنا وليد حديثها، وقالت: 'بعدها عملت مسلسل 'قاسم أمين' وفي الوقت ده كان في حرب في العراق وسياسيا الناس مكنتش مهتمة، بعدها عملت مسلسل قصة الأمس واتجوزت وبقيت حامل في بنتي مريم، وبعدها حامل في بنتي مايا وبعدها الثورة'.

تصريحات ميرنا وليد

وأضافت ميرنا وليد كلامها، وقالت: 'المشكلة أن بعد ما تعملي عمل حلو أوي بيجيلك كمية أعمال كتيرة لكن بيكون في حاجات بيصعب عليكي أن تقبليها، مكنش ينفع أعمل أي حاجة بعد قصة الأمس واستنيت يجيلي حاجة كويسة سنين لحد ما جالي قيد عائلي، وهو كان عمل هايل ودوري كان جديد، المشكلة لما بتعملي عمل قوي بشيل هم بعده هعمل إيه، ولما بيجيلي أي حاجة بتصعب عليا نفسي ونجاحي'.

واختتمت ميرنا وليد كلامها: 'مش بخاف إني أبعد عن الجمهور لأن الناس عودتني أن مهما بعدت بلاقيهم بيتعاملوا معايا إني موجودة، كمان الأعمال الكويسة بتتعرض على طول، مثلا قصة الأمس بقاله سنين لكن مفيش كل 3 شهور قناة ما بتعرضه و'ذئاب الجبل' لحد النهاردة بيتعرض'.