سحر رامي : ولادي بيفتكروني مجنونة بسبب حسين الإمام

تحدثت الفنانة سحر رامي عن زوجها الراحل الفنان حسين الإمام، قائلة: «زوجي الفنان الراحل حسين الإمام وحشني أوي ونفسي يكون موجود معايا غيابه مأثر فيا جدًا».

سحر رامي وزوجها حسين الإمام

وتابعت الفنانة سحر رامي حديثها عن زوجها حسين الإمام وأولادها، في تصريحات تلفزيونية لها، قائلة: «ساعات ولادي بيدخلوا عليا بيفتكروني مجنونة علشان بكلم حسين الإمام».

واستكملت: «طول الوقت بكلم حسين الإمام وباخد رأيه في كل حاجة وكإنه عايش معايا، كان بينا تواصل غريب ومحدش بيفهمني غيره».

سحر رامي وحسين الإمام

تصريحات سحر رامي

وفيما يخص بدايتها الفنية، قالت إن أول بداية تمثيل لها كانت مع الفنان محمد صبحي في مسرحية المهزوز، ومسرحية أنت حر، ثم عادت إلى فرقة الباليه، ودخلت بعدها في مجال الإعلانات.

وقالت الفنانة سحر رامي أيضًا: «لما عملت إعلانات حققت نجاح كبير، وبدأت أتعرف في الوسط الفني وبدأوا يعرفوا اسمي وشهرتي، وبعد كده فؤاد المهندس عرفني من الإعلانات وقالهم هاتولي البت بتاعت الشراشيب لإنه مكنش يعرف اسمي، وبعد الإعلانات اشتغلت مع الفنان فؤاد المهندس في مسرحية قسمتي».

وأضافت: «وبعد كده عملت إعلانات تاني وفوازير وخلال الفوازير كان فيه مسلسلات ومسرحيات، وأول لقاء جمعني بفؤاد المهندس كان في مسرح الزمالك، واتعرفت عليه وقال لي عجبتيني أوي في إعلان الشراشيب بالحركات، وقال لي عايزين تمثلي معانا علي المسرح واختبرني ونجحت».

سحر رامي وهيثم أحمد زكي

وكشفت حقيقة مقاضاتها للفنان الراحل هيثم أحمد زكي بسبب فيلم كابوريا، معلقة: «فيلم كابوريا لأحمد زكي كان من إنتاجي أنا وزوجي الراحل حسين الإمام، ولما جينا نعمل الفيلم مكنش معانا رأس مال كبير، والأرقام المالية مكانتش كبيرة زي دلوقتي، وأجور أحمد زكي ورغدة بسيطة جدًا والفيلم نجح نجاح عظيم جدًا، وعمل نقلة في السينما وأخذنا جائزة أفضل فيلم».

وقالت أيضًا: «وأحمد زكي كان في أحسن حالاته، ورغدة كانت رهيبة وأغنية العمل كسرت الدنيا، وأنا مكنتش هعمل الدور بتاعي لأن كنا مقررين أنا وحسين الإمام إننا ننتج ومنشاركش في التمثيل علشان ميتقالش بيشغل مراته وأنا مش البطلة، ولكن خيري بشارة أصر إني أعمل الدور وكان شايفني في الدور بفيلم كابوريا، وفريق العمل كله كان كويس وبذل مجهود جبار في الكواليس، وكلنا كنا في أحسن حالاتنا في التمثيل».

واختتمت: «هيثم أحمد زكي كان عايز يعمل جزء ثاني من فيلم كابوريا، ولكن غير صحيح ما نشر إني قلت لو عمل كده هقاضيه، ومعرفش أصلا حاجة عن الموضوع ده من أساسه وأنا مش من حقي أقاضيه لأن الحقوق الفكرية ملك عصام الشماع، ولو حد أخد حتة من كابوريا هيدفع فلوس لإنه ملكي أنا».

سحر رامي

سحر رامي