سقوط مفاجئ بالملعب ولم يحقق أحلامه.. سبب وفاة الفنان بهاء الخطيب يصدم الوسط الفني

تسببت وفاة الفنان الشاب بهاء الخطيب في صدمة بالوسط الفني، بعد وفاته المفاجئة خلال الساعات الماضية.

وكتب الفنان والسيناريست كريم سرور عن وفاة بهاء الخطيب في منشور عبر حسابه الشخصي بموقع فيس بوك: «بهاء الخطيب مات!! إيه الاختبار ده!! ليه بالقسوة دى.. يعني إيه ده بالذات يموت ده مكنش بيمل ولا بيكل من كلامه عن أحلامه».

وفاة الفنان الشاب بهاء الخطيب

وتابع: «اللي ماشي يجمع فينا ويلا عرض يلا فيلم يلا نشتغل ومتستنوش الفرصة أعملوها، اشتغلوا حبوا بعض، عمري ماشوفتك مكشر حتى في عز إحباطك من اللي خذلوك علطول مبتسم في وش الناس، قلتلك يا بهاء أنت الوحيد اللي متأكد إنه هيكون نجم، كنت متأكد من ده، كنت عارف أن تعبه ده كله هيجيب فايدة».

واستكمل كريم سرور حديثه عن بهاء الخطيب: «يعني إيه مات قبل ما يحقق أحلامه، إيه ده! ليه كدة!! استغفر الله العظيم يارب، قلبى وجعني أوي أوي، مقهور يا أخي ومش عارف أبطل عياط عليك، مش هعرف أشيل خشبتك يا بهاء، مع السلامة يا جميل يا محترم يا بشوش يابو قلب أبيض، ربنا يرحمك يا حبيبي».

صدمة الوسط الفني بعد وفاة الفنان بهاء الخطيب

وأضاف: «تستحق تكون في جنة اللي خلقك، هو عارف إنك متستاهلش الدنيا دى يا بهاء، قلبي وجعني أوي ومش عارف أقول إيه ولا أكتب إيه، حقيقي مش مستوعب إزاى الموت قريب أوي كدة وقاسي كدة، غيابك هيفرق أوي يا بهاء والله العظيم، سلام يا صاحبي، ربنا يرحمك يارب ونبي أدعوله يا جماعة والله يستحق الدعوة والرحمة على قد نيته وقلبه وحبه للناس».

واختتم كريم سرور: «لا عمره قالي مين يستاهل ومين ميستاهلش مكنش بيقول غير نشتغل ونعمل اللي علينا وبس.. الله يرحمك يا بهاء يا موهوب يا نضيف، سلم على اللي عندك وأنتم السابقون ونحن اللاحقون».

سبب وفاة الفنان بهاء الخطيب

أعلن الفنان حسام داغر وفاة الفنان الشاب بهاء الخطيب، وودعه بكلمات مؤثرة بعد رحيله المفاجئ.

نشر حسام داغر صورة تجمعه بالراحل بهاء الخطيب، عبر حسابه الرسمي بموقع فيس بوك.

وعلق على الصورة قائلًا: «ده لسه متكلمين إنك تيجي تقعد معايا كام يوم في إسكندرية وقلتلك هتحب قعدة بلكونتي على البحر علطول ورجعت أقولك خلينا في الشتا هيبقى أحلى الجو دلوقتي صيف وحر.. خلاص لا بقى فيه شتا ولا صيف ولا حاجة».

وتابع حسام داغر: «الناس بتمشي فجأة إزاي كده لا حول ولا قوة إلا بالله دموعي منشفتش من يوم تيمور وقلبي لسه موجوع تقوم تمشي فجأة أنت يعني إيه وقع وهو بيلعب كورة مات».

واستكمل حديثه عن وفاة الفنان بهاء الخطيب: «أنا عقلي هيجراله حاجة الثبات والعقل والصبر من عندك يارب.. بهاء الجميل المحترم الطيب أعرفه من وهو في مسرح الجامعة وقبل المعهد وبرضه كبر قدامي وكان ناجح في كل حاجة حتي مجاله وشغله الأساسي جمب التمثيل».

واختتم حسام داغر: «لو اعرف أنك هتمشي فجأة كنت قابلتك ومفضلناش نأجلها ليه ياربي الطيبين المحترمين بيمشوا فجأة لا حول ولا قوة إلا بالله الصبر من عندك يارب».