سليمان عيد يكشف حقيقة خلافه مع أحمد السقا وكواليس عمله «آنسر ماشين»

تحدث الفنان سليمان عيد عن علاقته مع عدد من نجوم الوسط الفني مثل الفنان أحمد السقا والفنان كريم محمود عبد العزيز، معلقًا: «اعرف كريم وهو طفل في فيلم الناظر».

تصريحات سليمان عيد

قال سليمان عيد في تصريحات تلفزيونية له: «اتقابلنا أنا وكريم عند أحمد السبكي، وكان دايمًا طموحاته أكبر من أعماله في بدايته، ودرس إخراج لكنه نساه في الفن، وبقينا جيران وكنا بنتقابل عند محمد إمام وكان عايز يمارس مهنة الإخراج وبدأنا نعمل الفيديوهات دي».

واستكمل: «في الأول لوحدي وبعدين قولتله لازم تظهر معايا لأن الحاجات دي عملت معانا مردود حلو جدًا، ومفيش خلاف بيني وبين أحمد السقا، وأنا مبحبش أكلم حد كتير في حياتي بدون سبب ومحبش أما أكلم حد ميردش عليّ وأحمد ساعات بيكون مشغول ميردش، لكن مفيش حاجة بيني وبينه».

سليمان عيد

سليمان عيد وأحمد السقا

وتابع الفنان سليمان عيد عن الفنان أحمد السقا قائلًا: «استقبلني كويس في سيدتي الجميلة وأما رجع الشخص اللي كان عامل الدور مكاني في المسرحية طلبت منهم إنهم يرجعوه تاني لأني كنت ملتزم بحاجات تانية».

وقال أيضًا: «عمري من أيام عادل إمام ما قولت لزميل ممثل أنا عايز اشتغل، لو الدور مش محتاجني مش هفرض نفسي على حد، وفيلم جاءنا البيان التالي من الأعمال اللي عملتلي نقلة كبيرة، وأنا عامل 112 فيلم والواحد دايمًا بيجتهد إنه يطلع حاجة جديدة لنفسه».

وأضاف الفنان سليمان عيد: «والواحد بيفتكر إن ليها وقت وبتتنسي لكن لسة فيه مشاهد الناس فكراها وبترددها لحد دلوقتي، وأكتر إفيه معلم مع الناس بتاع القصيدة في فيلم عسكر في المعسكر».

سليمان عيد وزوجته

وقال عن حياته الشخصية مع زوجته: «أول ما اتجوزت اتفقت مع مراتي إن محدش يعرف حاجة عننا خالص وده سر نجاح زواجي، ومرة حصل مشكلة بينا وأهلها كانوا جايين دخلت غسلت وشها وكأن مفيش حاجة حصلت، عرفت وقتها إن بيتي هيكمل».

وأضاف: «اللي قاعد قدامك ده مراته ليها جزء في نجاحه لأنها موفرالي كل حاجة في حياتي فهي تنطبق عليها مقولة وراء كل رجل عظيم إمرأة، والست لازم تبقى مقدرة الراجل وبتحترمه وميبقاش كلام قد ما هو أفعال، مراتي عمرها ما قالتي يا فرعون ولو اتقال الكلام باللسان ممكن يضعف الفعل، وممكن تقوليلها عشان ترضيني بالكلام بس لو خيروني يدوني الفعل».

وفيما يخص عمله في بداية حياته كجهاز «أنسر ماشين»، أوضح أنه جسد شخصية النوبي في بداية حياته الفنية كثيرًا، حتى رشحه المخرج شاكر خضير للفنان سمير غانم، لتجسيد شخصية عسكري نوبي في مسرحية «جحا يحكم المدينة»، وبعد نجاحه طلب منه تسجيل رسالة بالشخصية النوبية على «أنسر ماشين» الخاص به للرد على المكالمات.

واختتم: «سجلت الرسالة على جهازه، ومن بعدها كل اللي يسمعها يموت من الضحك، ويطلب مني أسجل له رسالة خاصة به، بقت مهنة بالنسبالي كنت باخد منها 50 جنيه».

سليمان عيد