سميرة عبد العزيز: كنت رافضة الزواج ومش هقلع الأسود على محفوظ عبد الرحمن

تحدثت الفنانة سميرة عبد العزيز عن ذكرياتها مع زوجها الراحل محفوظ عبد الرحمن قائلة: «كان راقي للغاية في أفكاره ويقدر المرأة تقدير كبير».

وقالت سميرة عبد العزيز عن زوجها الراحل محفوظ عبد الرحمن في تصريحات تلفزيونية لها: «حتى في كل شغله كان بيطلع المرأة لها قيمة وفعالية».

سميرة عبد العزيز ومحفوظ عبد الرحمن

وتابعت: «أنا مش هقلع الأسود أبدًا على محفوظ عبد الرحمن، كان أدب وفن ورقي في الأخلاق وتقدير المرأة، أنا مفتقدة آراء محفوظ، جالي قبل كده مسلسل دور شغالة وهي التي تقوم بتربية الأولاد والأم مستهترة».

واستكملت الفنانة سميرة عبد العزيز: «وأنا عجبني وقولتله هعمله وقالي لأ متعملهوش اسمها شغالة هتلاقي كل المخرجين بتوعنا جايبينك تعملي شغالة، ومش هتلاقي شغل بعد كده واحترمت رأيه ومعملتش الدور، وفي يوم كنت عارفة أني رايحة التصوير وهرجع البيت الساعة 8 واتغير لحد الساعة 12».

سميرة عبد العزيز ومحفوظ عبد الرحمن

تصريحات سميرة عبد العزيز

وأضافت: «ومبلغتهوش فلما رجعت كان زعلان جدًا»، وعن بداية زواجهما، قالت الفنانة سميرة عبد العزيز: «بنتي كانت بتلعب مع بنته وعرفت أن أنا معنديش زوج فراحت قالت لباباها ما تتجوزها هي معندهاش زوج وأنا اتخضيت، فقام محفوظ قالي ما تيجي نسمع كلام البنات».

وقالت أيضًا: «قولتله أنا خلاص كان عندي تجربة قبل كده ومش عاوزة أكررها أنا هربي بنتي وهشتغل وأتفرغ للفن وسكت مقالش حاجة، وسافرنا تونس سوا والعلاقة اتوطدت أكتر وكنا دائمًا نجلس سويًا ونتناول الطعام والمخرج عرف الأمر قالي على جنب إنتي ليه رافضة تتجوزي محفوظ راجل محترم وظروفه زي ظروفك وإنتي مش كبيرة أوي علشان تقولي لأ».

قصة زواج سميرة عبد العزيز وزوجها

وتابعت سميرة عبد العزيز قائلة: «قولت للمخرج أنا اللي كنت متجوزاه قالي أنا مش متجوز ممثلة فلما بدأت أمثل، واتطلقنا وقررت أتفرغ للفن وقالي ده فنان وشغال فسكت، وقالي وافقتي وقام قايلنا هاتوا مأذون وملقناش مأذون في تونس وكان معانا مدام سميحة أيوب وقالت من الطيارة على بيتي وكلمت سعد الدين وهبة وقالتله حضر مأذون في البيت».

واختتمت الفنانة القديرة قائلة: «استمر زواجنا أنا ومحفوظ 34 سنة، ولم أسمع منه كلمة واحدة مسيئة إليّ».

سميرة عبد العزيز

سميرة عبد العزيز