سهير رمزي تكشف سبب رفضها الميراث من والدها.. فيديو

كشفت الفنانة القديرة سهير رمزي عن تفاصيل مؤثرة في حياتها الشخصية، حيث رفضت استلام ميراث والدها بعد وفاته، موضحة الأسباب التي دفعتها لاتخاذ هذا القرار بكل وضوح وصدق.

وأوضحت سهير رمزي، في مكالمة هاتفية مع الإعلامية نهال طايل ببرنامج تفاصيل المذاع على قناة صدى البلد، قائلة:'أنا فعلاً رفضت ميراث والدي، أولاً أنا ما شفتش أبويا خالص، ومامتي ولدتني وهي مُطلقة منه، وبعد ما ولدتني بحوالي 6 أو 7 شهور اتجوزت، ففتحت عيني على راجل تاني، كنت بقول له يا بابا، ما كنتش أعرف إن ليا أب تاني'.

وأضافت سهير رمزي، قائلة :'فضلت عايشة مع الراجل ده لغاية بقى عندي تقريباً 13 أو 14 سنة، وأنا فاكرة إنه أبويا، ولما كبرت عرفت إن لأ، ده مش أبويا الحقيقي، وإن ليا أب تاني، ولكنه كان متجوز وعنده أولاد وحياة تانية، وما سألش يعني زي آبهات كتير ممكن الدنيا تاخدهم'.

وتحدثت سهير رمزي، عن موقف والدها من مسيرتها الفنية، قائلة: 'حتى بعد ما بقيت نجمة ومكسرة الدنيا، هو كان رافض ده، رافض النجومية وكل ده، وكان له تفكير وسكة غير تفكير أمي وتفكيري تمامًا، وأنا ما عشتش معاه خالص'.

أما عن سبب رفضها الميراث، فأوضحت سهير رمزي، قائلة: 'لما توفى، الحمد لله كنت مستورة، وعندي اللي يعيشني، ومش محتاجة حاجة وأنا ما خدتش منه حاجة وهو عايش.. هاخد منه ليه وهو متوفي؟، ولاده اللي عاشوا معاه ورباهم هم أولى، أنا هاخد منه ليه دلوقتي إذا كنت محتاجاله وهو عايش وما لقيتهوش'.

وتابعت سهير رمزي قائلة: 'مش محتاجة للفلوس، طالما ربنا ساترها معايا، عمر الفلوس ما بتعوض أي حاجة، أنا كان يهمني وجوده هو بس'، أنا رفضت الميراث لأنهم أولى، وأنا ربنا مديني من فضله، مش ناقصني حاجة الحمد لله'.