شارموفرز يطرح «هل ؟» لدعم أهل غزة.. فيديو

طرح فريق شارموفرز، أغنية جديدة بعنوان «هل ؟»؛ دعمًا لـ القضية الفلسطينية وأهل غزة، عبر قناتهم الرسمية بموقع يوتيوب، والمنصات الموسيقية المختلفة.

أغنية «هل ؟» من كلمات محمد الشافعى، وألحان أحمد بهاء، وتوزيع محمد العرقان، ومن توزيع شركة «ديجيتال ساوند».

وقرر فريق شارموفرز طرح أغنية 'هل ؟'، لتسليط الضوء على الكوارث الإنسانية التي تحدث على الأراضي الفلسطينية، وما يتعرض له أهالي قطاع غزة على يد جيش الاحتلال الإسرائيلي، وتضامناً من الفريق وتعبيرا عن حزنهم، فى ظل استمرار الحرب بوتيرة قوية تحصد معها أرواح مئات الفلسطينيين يوميًا.

كلمات أغنية «هل ؟»

تقول كلمات أغنية «هل ؟»:-

«هل فيه طريقة .. للرجوع للحياة ؟

بعد الحقيقة  .. وبعد اللي شوفناه

بعد انعدام الانسانية .. والرجوع للجاهلية

والمشاهد المأساوية .. وكل اللي عيشناه

هل فيه طريقة .. نبتسم ونعيش

والناس هناك .. يومهم ميعديش

مع اننا نفس القضية  .. وكلنا نفس الضحية

الفرق بينا خطوتين .. يعني المسافة ، مفيش

بعد استماع .. صوت الاهات

ع التليفونات .. رؤيا الوشوش المقهورين

جوه الشاشات

بعد ما عرفنا ألام .. وعيونا بطلت تنام

وحضرنا قَتل الأُمنيات

وشوفنا ناس بِقلوب حَجر .. عُمي النَظر

إخترعوا أسباب للسكات

ميهمهومش لا صوت صريخ..  ولا صوت عِياط

ويهمهم صوت ضحكهم ، وقت الحداد

هل فيه طريقة .. للرجوع للحياة

بعد سمع بُكا البنات ع الأمهات

وجع الأم وحزنها .. خوفها وكسرة قلبها

قلة حيلتها وضعفها .. واملها تحصل معجزات

هل فيه طريقة .. نبتسم ونعيش

والناس هناك .. يومهم ميعديش

مع اننا نفس القضية .. وكلنا نفس الضحية

والفرق بينا خطوتين .. يعني المسافة مفيش

بس احنا برضه مؤمنين بالله .. مين يهزم اللي ربه واقف معاه

هنشوف على وشوشهم ف يوم .. نفس الألم نفس الوجع والكسرة

والخوف والهموم .. والفرق بينا اننا

مِسلمين ل ربنا .. ووعده لينا اننا هنقوووم».