«شال ذنب عياله اللي شافوه بيموت».. نهى صالح تنشر فيديو الحادث المأساوي لوفاة شقيقها

كشفت الفنانة نهى صالح تفاصيل جديدة عن الحادث الذي توفى بسببه شقيقها بالإسكندرية، بعد تصادم موتوسيكلات بايكرز.

نشرت نهى صالح فيديو الحادث عبر حسابها الرسمي بموقع فيس بوك، وعلقت قائلة: «لكل واحد دافع عن العربية بكل ظلم وغلط أخويا وهو مش حاسس بينا، الفيديو أهو كانوا ماشيين على طريق سريع وقدامهم عربية ماشية على الشمال وهما كانوا يمين وفوقهم كاميرا يعني مش ماشيين بسرعة لأن ماشين بسرعة الرادار وابتدوا يناموا على تانك البايك ويهدوا السرعة وفجأة سواق العربية قرر يعطي إشارة يمين ويهدي مرة واحدة علشان يجي من رابع حارة كان ماشي فيها لأول حارة وأول مفرق على إيده اليمين».

وتابعت: «لأنه كان عايز ياخدها بالعرض فهما اتخضوا منه فخبطوا في بعض قدام العربية، فعمل إيه السواق كمل طريقه عادي ولا كأنه عمل حاجة ما تهزش لحظة للبايك وهي ماسكة فيه النار كمل بكل جحود ولا كأن حصل حاجة جنبه فيها أرواح ونار، وأحب أقول للسواق أن مش ذنبهم بس اللي في رقبتك، ذنب عياله كمان لأنهم شافوا الحادثة بعينيهم وشافوا أبوهم بعنيهم وهو بيموت وأنت مكمل عادي ده بالنسبالك».

واستكملت نهى صالح: «أما بالنسبة للي صور فده مش لاقية كلام أوصفك بيه إزاى قدرت يا عديم الإنسانية أنك تصور حتى بعد الحادثة بدقيقة وكملت برضه طريقك عادي، إزاي فضلت ماسك التليفون والنار مولعة في الموتسكلات كل ده علشان عايز تلحق تنزل الفيديو علشان اللايك والشير».

واختتمت: «طيب أحب أقولك أن عيال أخويا اللي شافوا الحادثة بعينهم كانوا ممكن يتخطوا مع الزمن بس الفيديو اللي حضرتك صورته بيفتحوه كل شوية علشان يشوفوه، فذنبك كبير عند ربك يا عديم الدين والإنسانية فوضت أمري لله هو حسبي ووكيلي.. أنا عايزة حق أخويا وأنس من اللي قهر قلبي عليه العربية واللي صور الفيديو حتى بعد الحادثة وشاف النار حتى ماساعدهمش، لازم يتحاسبوا دمروني ودمروا عياله ومراته وحياتنا كلها».