شريف منير: مخدتش مراتي التانية تخدم الأولى ولا أقبل الإهانة من شيرين عبد الوهاب

ياسمين حمادة 25 مارس 2023 | 10:42 مساءً

كشف الفنان شريف منير الكثير من الأسرار عن حياته الشخصية والفنية ومواقف جمعته بنجوم الفن، ومنهم الفنان هشام سليم والفنان ممدوح عبد العليم، حيث كانوا قريبين منه جدًا.

تصريحات شريف منير

قال شريف منير في تصريحات تلفزيونية : «كنا بندخل بيت بعض وكانت حياتنا قريبة جدًا مع بعض، هشام سليم كان عزيز النفس، لدرجة إنه كان مريض ولم يخبر أحد، ولم يلجأ لأحد ولم يطلب مساعدة في العلاج».

وتابع شريف منير عن هشام سليم، قائلًا: «وكان حديثه مع الله فقط، وآخر اتصال بيننا كان قبل وفاته بيوم، وقلت له أنا جاي لك بعد بكرة يا هشام ولكن لم يسعفنى الوقت».

شريف منير

حقيقة زواج شريف منير

وتحدث شريف منير عن حقيقة زواجه، ونفى الشائعات عن خوضه تجربة الزواج الثاني بسبب مرض زوجته الأولى، معلقًا: «في حاجات كتير زادت وأخذت أكتر من حجمها منها أن مراتي اللي توفت أم أولادي كانت تعرف زوجتي الثانية وصاحبتها، والحقيقة مراتي الحالية متعرفهاش وزارتها مرة واحدة في مرضها».

وتابع: «أنا مخدتش مراتي التانية تخدم الأولى والكلام ده من اختراعات السوشيال ميديا.. زوجتي الثانية تعاطفت مع مرض زوجتي الأولى الراحلة راحت زارتها مرة عشر دقايق ومشيت، وزوجتي الأولى كانت في عز صحتها خلال زواجي الثاني ومرضت بعد جوازي بكذا سنة».

أسرار شريف منير

واستكمل: «كان في بينا خلاف وأنا خيرتها ننفصل فرفضت.. وقلت لها أنا هتجوز قالت لي حقك، ثم تعافت بعد العلاج الكيماوي وكانوا بيجوا هي وأولادي كل يوم جمعة نقضيه في بيتي وبعد كده المرض زاد وأنا مش بالقسوة دي عشان أتجوز عليها في مرضها».

وقال شريف منير أيضًا: «زمان لما كنت أشوف الهجوم والشتائم كنت أنفعل ودلوقتي لا، وأنا بخش أدور على الحاجات اللي بتضايقني عشان أستمتع بالبلوك».

شريف منير وشيرين عبد الوهاب

وفيما يخص أزمة شريف منير وشيرين عبد الوهاب، علق قائلًا: «المشكلة مكنتش زي ما قيل على السوشيال ميديا إن تكييف نقط مياه على البلكونة».

واختتم: «بل كان بسبب إن رخام وقع من شقتها وولادي بيلعبوا وزعلت لأن ولادي كان ممكن يتعوروا وهما بيلعبوا، ولكن رد الفعل كان مش كويس وكان ممكن أتنازل بمزاجي بس لا أقبل الإهانة لذلك روحنا القسم».

شريف منير