شريف منير يدعم ابنته بعد حلاقة شعرها: متربية كويس جدًا ومعملتش حاجة غلط

حرص الفنان شريف منير على دعم ابنته أسما شريف منير التي تعرضت لحملة شرسة من الهجوم عقب حلاقة شعرها أمام الجمهور.

شريف منير يدعم ابنته أسما شريف منير

قال شريف منير خلال فيديو نشره عبر حسابه بموقع إنستجرام: 'مساء الخير، إيه الدوشة اللي إنتو عاملينها دي وإيه الضجة اللي إنتو عاملينها دي، كل ده عشان بنتي قصت شعرها قدام الكاميرا إيه الغلط اللي هي عملته، تصرف عادي جدًا مفيهوش أي حاجة، إوعوا تفتكروا إني هاجي على بنتي عشان خاطر أكسب رضاكم'.

وتابع منير حديثه، وقال: 'دي بنتي اللي ماليش غيرها وبحبها، وبالمناسبة اللوك اللي عملته عاجبني وأنا مبسوط منها أوي، بس قبل ما الإخوة السادة الملايكة الصالحين اللي عمالين يقلوا أدبهم ويشتموا، وبيقولوا تاخد التريند وجاتها البلاء في شكلها وبيقولوا أبوها معرفش يربيها، لا أنا بنتي متربية كويس جدًا بس هي بتتصرف باللي هي حاسة بيه'.

 

View this post on Instagram

 

A post shared by Sherif Moneer (@sherifmoneerofficial)

واستكمل شريف منير حديثه، وقال: 'المهم إنها متكونش بتأذي حد، وقبل ما تتكلموا بصوا على نفسكو واتفرجوا على عيلتكو وعلى إخواتكو وعلى الناس اللي حواليكو قبل ما تنتقدوا وتغلطوا وتقولوا متربتش بتلاتة تعريفة أو بربع جنيه تربية، لا أنا بنتي متربية كويس جدًا'.

وأضاف: 'على العموم ريحو نفسكو واهدوا شوية، لإن اللي حصل من بنتي مش غلط ومش عيب هي مغلطتش في حد فيكم ومغلطتش في نفسها وبعدين بنتي عندها 36 سنة وأم وعندها بنوتة ومسئولة عن نفسها، وأنا أب مسؤول إني أحميها وهي حرة في تصرفاتها'.

واختتم حديثه، وقال: 'أسما أنتي شكلك زي القمر وشكلك حلو جدًا وخدتي التريند برافو عليكي، متسمعيش كلام حد ومتهتميش بكلام حد وأنا مش مهتم بالكلام اللي بيتقال عليا ولا عليها المهم إننا مش بنضر حد، سلام عليكم'.

أسما شريف منير وأزمة شعرها

تحدثت أسما شريف منير، عن أزمة حلاقتها لشعرها واثارة حالة من الجدل عبر مواقع التواصل الإجتماعي المختلفة.

وكتبت أسما شريف منير، عبر حسابها الشخصي على موقع التواصل الإجتماعي إنستجرام، وعلقت: طيب أول حاجة شكراً علي كل ردود الفعل الوحشة والحلوة كلها، ساعات موقف زي دي بتخلي ناس تشوف ناس تانية عاملين ازاي مجرد انهم بيعبروا عن رأيهم، وشكراً لكل الناس اللي كانت خايفة و قلقانه عليا، ممكن بقي اقولكم الحكاية من وجهة نظري ببساطة.

وتابعت أسما شريف منير: أولا الحكاية جت بالصدفة جداً وكان قرار لحظي وانفعالي جداً ومش ندمانة عليه، وتاني حاجة أنا مش بعمل كده عشان أطلع تريند بس كنت عارفة اني هبقي تريند.

واستكملت أسما: في فرق كبير بين عايزه وعارفة، على فكرة التريند ده نقمة مش حاجة حلوة خالص بس مش هدخل في الجدل ده دلوقتي، وتالت حاجة أنا الحمد لله كويسة ومبسوطة ومش واخدة الخطوة دي بسبب اكتئاب خالص بالعكس.

وتابعت أسما: دي صفحة جديدة حلوة مليانة تفاؤل وقوة وإرادة وتحدي وجرأة وشجاعة وكل حاجة إيجابية في الكون، أنا فعلا من فترة كنت بمر بمرحلة صعبة جدا بس كنت في رحلة بقالي شوية بتعافى منها وبقف على رجلي من الأول وكان آخرها رحلة دهب.

وأضافت أسما: فا تاني بالعكس ده مش اكتئاب ده مرحلة انتقاليه مؤمنه اني هحقق فيها حاجات كتير.. اخر حاجة الجماعة اللي مكبرين الموضوع (ده شعري مش شعرك) وحاجة كده بجد اخيرة (أنا عاجبني شكلي جداً بصراحة، شكله جامد ومديني ثقة في نفسي جداً) بحبكم اوي بجد.

وظهرت أسما شريف منير، على السجادة الحمراء لحفل مهرجان القاهرة للدراما بدورته الثانية بمدينة العلمين الجديدة.

ويعد هذا الظهور الأول لـ أسما شريف منير بدون شعرها بعد حلاقته والتخلي عنه بعد معاناتها من الغدة.