أعربت الفنانة شهيرة عن انزعاجها وغضبها من انتقادات ظهورها في حفل افتتاح مهرجان القاهرة السينمائي 2026 بدون حجاب، وحرصت على الرد بشكل حاسم.
كتبت شهيرة في منشور على حسابها الشخصي بموقع فيس بوك: «مش عارفة إيه الروح الشريرة دي اللي مسيطرة على السوشيال ميديا من ناحية الفن والفنانين، ليه مش كل واحد ينظر داخله ويحاسب نفسه أولًا ثم ينتقد غيره».
وتابعت: «وخاصةً الشخصيات العامة يعني مفيش حاجة تتسلوا عليها تانية، نازلين هجوم عليا عشان روحت مهرجان بلدي أدعم مهنتي التي أصبحت تتعرض لهجوم غير مبرر وخاصة أنني أكاديمية ودارسة أهمية الفن وتأثيره في المجتمع ولو كره الكارهون».
واستكملت شهيرة: «وبعدين أنا حرة إيه خلعت الإيشارب اللي هيسبب فتنة وقلت قبل كده أنا ست محتشمة وطول عمري لا أخرج عن الحدود المألوفة واللائقة وهذا يكفيني، أما بقي أروح محافل فنية ولا ماروحش أنا حرة»,
وأضافت: «ده غير بقى ينزلوا صور تشويه لشكلي وملامحي حاجة تضحك، عمومًا أي موقع من تحت السلم أو كومنت هيتعدى الحدود هقاضيه لأن الفنانين بيتعرضوا لهجمة شرسة غير مبررة بس هقول إيه إذا كان محمد صلاح فخر العرب كلهم والإنسان الوحيد اللي رفع اسم مصر عاليًا في العالم كله بيتهاجم هجوم عنيف غير مفهوم يبقي أنا أو غيري مش هنتهاجم».
واختتمت شهيرة: «أرجع وأقول لا تتدخلوا فيما لا يعنيكم حاسبوا أنفسكم أولًا قبل أن تحاسبوا الآخرين وشكرا للناس السوية اللي دعمتني ودعمت ظهوري».
