شوبير: الأهلي تأخر في تجديد عقود لاعبيه وقد يخسرهم

وجه الإعلامي أحمد شوبير، حارس مرمى الأهلي والمنتخب المصري السابق، تحذيرًا لإدارة النادي الأهلي من التأخر في ملف تجديد عقود عدد من اللاعبين، مشددًا على أهمية التحرك المبكر لضمان استقرار الفريق فنيًا خلال الفترة المقبلة.

وقال شوبير في تصريحات إذاعية : «الأهلي لسه لم يبدأ التفاوض مع اللاعبين بشأن ملف تجديد العقود ومتأخر أوي في القصة دي والمفروض إنك تبدأ التفاوض مع اللاعبين اللي عقودهم قربت تخلص وتتكلم معاهم أو تقول إن الناس دي مش هتكمل معاك».

أضاف: «هتسمع بقى أخبار إن عبدالقادر منتظر النادي وبيجهز عروض بديله، هو عبدالقادر لو لم يتفق مع النادي الأهلي هل مش هيجيله عرض واتنين وتلاتة وأربعة؟ طبيعي مليون في المية إن يجيله عروض من الزمالك وبيراميدز وسيراميكا والبنك الأهلي، وأنا هنا بتكلم عن العروض المحلية، معرفش عنده عروض من بره ولا لا وإن كنت أشك».

وتابع: «حسين الشحات لو الأهلي موصلش معاه لنتيجة مش هيجله عروض لا طبعًا هيجله عروض ونفس القصة أليوديانج».

وأتم: «أتمنى إن اللاعيبة اللي عقودهم قربت تخلص الأهلي يخلص معاهم بدري بدري».