طارق لطفي عن الحجاب: مينفعش أقول رأيي في التلفزيون

علق الفنان طارق لطفي على رأيه في الحجاب، وتفاصيل اعتذاره عن دور في مسلسل للمخرج محمد سامي.

قال طارق لطفي عبر تصريحات تلفزيونية: «رأيي الشخصي مينفعش أقوله في التلفزيون لأن الناس بتتفرج عليّ علشان ملخبطش الناس، الأزهر بالكامل يقول الحجاب موجود وفرض».

تصريحات طارق لطفي عن الحجاب

وتابع: «وبعض شيوخنا من الأزهر والدكاترة يقولون إنه مش فرض وهو عادة اجتماعية، وأنا واقف في النص مش عارف أسمع هنا أو هنا، وأقول في الآخر استفتي قلبك».

واستكمل طارق لطفي: «غطاء الرأس كان للستات والرجالة، ولغاية دلوقتي عندنا عيبة كبيرة الراجل يطلع من بيته في الصعيد أو الفلاحين من غير ما يغطي راسه، وقبل ثورة 1952 كان لازم الطربوش، وفي أوروبا وأمريكا تلاقي غطاء الرأس».

موقف طارق لطفي من خلع زوجته للحجاب

وأضاف: «هي بشكل أو بآخر كانت عادة اجتماعية عند كل الناس وجزء من الزي، وأعتقد غطاء الرأس والحجاب شيء واحد».

وفيما يخص حقيقة طلبه من زوجته خلع الحجاب، علق طارق لطفي قائلًا: «لأ، دي علاقتها بربنا، أنا لا وصي ولا وسيط أنا ناصح حتى مع أولادي، ولو زوجتي قالت عايزة تلبس الحجاب هقول لها اتفضلي».

أعمال طارق لطفي

وكشف سبب رفضه تقديم دور «شاذ» في مسلسل كلام علي ورق للمخرج محمد سامي، قائلًا: «رفضت الدور بسبب عائلتي بالكامل، أنا كنت موجود من البداية قبل كتابة ورقة واحدة من المسلسل، وكنت باني الشخصية مع محمد سامي بطريقة مختلفة، إن هذا الشخص مش شاذ، لكنه يمثل الحكاية دي لأنه صاحب كباريه وبسبب طبيعة وظيفته».

واختتم طارق لطفي: «لقيت اللي اتكتب غير كده، وخوفت جدًا واستشرت زوجتي وأولادي وأمي لأن كل ده يمسهم بشكل أو بآخر، وفي الآخر قررت إني مش هعمل كده، واللي قرأته كان بدون هدف لتقديم هذه الشخصية، وإحنا جمهورنا العربي أصعب جمهور، لأنه يصدق ويتأثر إلى درجة كبيرة، وخوفت على الناس من إن الموضوع يتشاف كحاجة لطيفة وعادية».

طارق لطفي