«طالبنا باستخراج الجثة».. وفاء عامر تبرأ نفسها بعد اتهامات الإتجار في الأعضاء ونجوم الفن يتدخلون

حرصت الفنانة وفاء عامر على الدفاع عن نفسها، ضد حملة الاتهامات التي طالتها عبر مواقع التواصل الاجتماعي مؤخرًا، بشأن اتهامات الاتجار في الأعضاء.

قالت وفاء عامر عبر تصريحات تلفزيونية: «بنفي كل اللي اتقال جملة وتفصيلًا، شيكا كان مريض سرطان تم استئصال جزء من القولون، واتعمله تحويل مسار، ومينفعش واحد كان نفسه يبقى بطل من أبطال الجمهورية في كرة القدم ويضحي بالكلى وفص من الكبد».

وفاء عامر تدافع عن نفسها

وتابعت: «طالبنا باستخراج الجثة وتشريحها، عشان نعرف الحقيقة وأنا هاخد حقي بالقانون».

وأعربت وفاء عامر عن غضبها الشديد واستيائها من تداول مقطع فيديو تظهر به سيدة تتهمها زورا بالتورط في تجارة الأعضاء البشرية، والتسبب في وفاة لاعب الكرة السابق إبراهيم شيكا.

وقالت أيضًا: «أنا مش هسيب حقي.. إحنا في بلد قانون، ومفيش حد يستخبى ورا شاشة أو حتة حديدة ويشتم ويتهم الناس باتهامات خطيرة بالشكل ده، دي مش حرية، الناس في نقابة المهن التمثيلية على راسي.. أنا اخترتهم عشان يعبروا عني وعن زملائي، وأنا واثقة إن الحق هيظهر، ولازم يكون فيه رادع على السوشيال ميديا».

واستكملت وفاء عامر: «ناس كتير بتطلب مساعدات، سواء علاج أو مشروعات صغيرة، وأنا بحاول أساعد على قد ما أقدر.. فيه واحدة جابتلي أكل بيتي من مشروعها عشان أدوقه، اشتريته فورًا.. ازاي آخده ببلاش؟ هي بتساعد جوزها وبتصرف على بيتها، وفيه ناس كتير بتعمل زى ما أنا بعمل، منال سلامة، بدريه طلبة، انتصار، عايده غنون، أيوب، وغيرهم كتير.. كلنا بنحاول نساعد، بس مش شرط نعلن عن كل حاجة».

نجوم الفن يتضامنون مع وفاء عامر

وحرص عدد كبير من نجوم الفن على دعم وفاء عامر، ومنهم المطربة أمينة التي كتبت في منشور عبر حسابها الرسمي بموقع انستجرام: «ربنا وحده أعلى وأعلم حجم ألمي عليكي من ناس لا عندهم أصل ولا فصل.. الست دي بنت أكابر، أبوها راجل تاجر في سوق كبير الله يرحمه عم فاروق عامر».

وتابعت: «الراجل اللي رباهم على العز، أنا شفت ده بعين خالاتي وأهلي في باب عمر باشا عن الجدعنة، مش هقولكم عن كرمها وحبها للخير وحبها لفرحة الغير.. ست بنت بلد بتحترم الصغير قبل الكبير، عايزة أقول حاجات كتير أوي عنك يا أم عمر لأنك تستاهلي كل خير.. اتقوا الله وكفاية عبث وقلة أدب، ده انتو هتخلوا الواحد يراجع نفسه مليون مرة وهو بيقدم على فعل خير، ده مش جزاءها.. عيب والله».

بينما كتب الفنان هاني رمزي: «صديقتي وأختي وزميلتي وفاء عامر.. مفيش حد في جدعنتك ولا كرمك ولا طيبتك، وربنا يحفظك ويخليكي لأسرتك ولكل اللي يعرفوكي كويس.. لأن واضح إن فيه ناس لسه ما يعرفوش مين وفاء عامر بجد».

ومن جانبها، دافعت الفنانة منة فضالي عن وفاء عامر، قائلة: «نجمة كبيرة وست جدعة و100 راجل، وعيب أوي أوي اللي بيتقال عليها ده، طول عمرها بتعمل خير كتير وكريمة مع كل الناس.. ليه عدم التربية والاتهام اللي ملوش أي لازمة؟ يا أحلى وفاء، إنتي نجمة وجميلة ومحبوبة، وسيبك من الناس اللي ما وراهاش غير الهري».

وكتب الفنان أمير كرارة في منشور عبر حسابه بموقع فيس بوك: «الأخت الجدعة بنت الأصول اللي دايمًا بتعمل خير، وكل الدنيا بتحبها.. كلنا جنبك وبنحبك».

وأعلنت نقابة المهن التمثيلية تضامنها مع الفنانة وفاء عامر، ضد الحملة المغرضة الموجهة لها، مؤكدة أنه تم تشكيل لجنة قانونية من كبار المحامين لمتابعة الأمر واتخاذ ما يلزم من إجراءات، انطلاقًا من دور النقابة في حماية أعضائها والدفاع عنهم، وأنها تواصلت معها مساء أمس للاطمئنان عليها، ومتابعة الموقف عن قرب.

وأشارت النقابة في بيانها إلى أن وفاء عامر فنانة كبيرة تعتز بها، وأنها صاحبة مسيرة فنية مشرفة ومواقف وطنية وإنسانية مشهودة، مشددة على دعمها التام لها في مواجهة أي إساءة أو تجاوز.

وفاء عامر