عزة مصطفى: الإخوان شغالين بشكل فج على الجيش المصري وعمل فتنة بين المسلمين والمسيحيين.. فيديو

نفت الإعلامية عزة مصطفى، أن يكون وجود جماعة الإخوان الإرهابية انتهى من الساحة، لافتة إلى أن من يعتقد ذلك الأمر فهو مخطئ؛ مضيفة أن هذه الجماعة أصبح لديها قنوات إعلامية جديدة.

تحذير من عودة الإخوان

واستطردت عزة مصطفى، خلال تقديم برنامج «صالة التحرير» المذاع عبر قناة «صدى البلد»: «اللي يقول إن الإخوان انتهوا ده كلام مش صحيح، واللي يقول تمويل الإخوان خلص ده كلام مش صحيح؛ والدليل إنه بقى ليهم قنوات إعلامية جديدة غير اللي كانت موجودة».

وأضافت الإعلامية عزة مصطفى: «الإخوان بيكثفوا التسخين، وملفتش نظر حضراتكم كام حساب جديد ظهر على السوشيال ميديا؟، وكمية الهجوم والتدني الرخيص اللي بيحصل بشكل صريح؟؛ بعد ظهر حسابات كتير مرة واحدة، لما تقعد تشغل دماغك لازم تنتبه لـ 3 حاجات أولًا تسخين الشعب المصري على وطنه بسبب الغلاء اللي جالنا من بره».

الأزمة الخارجية

وتابعت عزة مصطفى: «وده بدليل إننا كنا أفضل قبل الغلاء ده ما ييجي من برة، ولو لاحظت إن الإخوان شغالين بشكل فج على الجيش المصري العظيم اللي العالم كله بيشيد بيه، وشغالين على عمل فتنة بين المسلمين والمسيحيين؛ والغرض حدوث وقيعة بين الشعب وبعضة والشعب وجيشه والشعب وقيادته».

وأردفت الإعلامية عزة مصطفى: «ودايمًا بقولكم ركزوا في الأخبار عن ليبيا والسودان واليمن وأثيوبيا؛ شوفوا الحالة العامة إيه بالنسبة للأسعار؟، وشوف وضعك إيه انت كمصري؟؛ دايمًا بدعيلهم يا رب ترجع الشعوب لحالة الاستقرار، وفيه كتير من أهل الدول دي في مصر سابوا بلادهم وجم مصر واشتروا بيوت ودخلوا أولادهم جامعات؛ وأعتقد إن الموضوع واحد ومش محتاج تفكير ولا فتي».

خراب الدول

وتابعت عزة مصطفى: «ارجع لحدودك والدول اللي حواليك وقولي فين الدولة اللي واقفة على رجليها؟، وأنا قلت جزء بسيط لأني عاوزة أختصر، وباقي الدول دمار وحروب؛ بلدك الوحيدة اللي واقفة على رجليها، وبيراهنوا طول الوقت على الإحباط والوقيعة بيننا، وبيراهنوا على احتمال إن يكون فيه جزء مننا نسى الأيام السوداء اللي عشناها، وننسى السلاح اللي كانوا مخزنينه كأنهم داخلين حرب، والدم اللي كان في الشوارع».

وأكدت الإعلامية عزة مصطفى: «وفي الآخر عندك أربع حيطان عندك وطنك، وأنا بقول جزء من اللي شفته، أنا شفت بلاوي سوداء أيام 2011 في ماسبيرو، وكلنا كمصريين بنقول إنهم عاوزين يرجعونا للأيام السوداء، ويقينًا لا مش هيحصل لأنهم عارفين إن الشعب المصري رافض المصالحة معاهم؛ وبالتالي فإن البديل هو الدمار، واللي احنا فيه ربنا ينجينا منه».

دعم المواطنين

واختتمت عزة مصطفى حديثها قائلة: «خلوا بال حضراتكم إن امبارح كان الرئيس عبد الفتاح السيسي وجه الحكومة بعدم وجود زيادة تحصل على المواطن المصري، وشوفوا التصريحات في الدول الأوروبية إن المواطن لازم يتحمل جزء علشان الفترة دي تعدي، والرئيس السيسي أعلن اليوم برنامج حماية اجتماعية للمواطنين من خلال أرقام تتحملها الدولة».

عزة مصطفى: نحتاج مليون طلعت حرب لتحقيق حلم الرئيس السيسي للدولة المصرية

عزة مصطفى لصاحب واقعة محل الكشري: بنعتذر لك عن الغباء والتعامل غير الإنساني