عمرو سعد يرد على مقارنة أعماله بمحمد رمضان: تشويش

رد الفنان عمرو سعد على الانتقادات التي تعرض لها خلال الأيام القليلة الماضية، بسبب برومو مسلسل سيد الناس، المقرر أن ينافس به ضمن موسم مسلسلات رمضان 2025.

قال عمرو سعد عبر تصريحات تلفزيونية: «الكلام الكتير على السوشيال ميديا، أنا يمكن لأول مرة بتكلم، ولما بتكلم متعود على الوضوح التام والصراحة، لأن ناس كتير تعرف عني إني رجل قليل الكلام وبخجل أطلع تكلم، ولا أحب أشير إلى نجاح نجحته أو مشاهدة حققتها، وده حرصًا على مجهود كل الناس اللي اشتغلت».

تصريحات عمرو سعد

وأضاف: «زملائي اللي بيعملوا أعمال رائعة أنا شخصيًا بتفرج عليها وأتابعها وبكلمهم أهنئهم وأنا من جمهورهم، مينفعش تشاور على نجاحك، إحنا بنحلم نعمل حاجة تأثر في الجمهور وتسعدهم، والعمل بيخلص بنفكر في العمل اللي بعده، لكن للأسف الشديد الصمت ده بيتفهم غلط بعد توحش السوشيال ميديا، ووجود حملات مدفوعة الأجر لصناعة انطباعات معينة وكاذبة ومزيفة شيء غريب جدًا، وللأسف الشديد إن الجمهور بتاعنا، هو جمهور طيب».

وعلق عمرو سعد على تشبيه الجمهور مسلسله الجديد بأعمال الفنان محمد رمضان، حيث قال: «في النهاية ممكن يحصل تشويش لانطباعات الجمهور عن الأشخاص والأعمال، بقت حاجة غريبة ومريبة بعد تفشي ظاهرة السوشيال ميديا، وأن الناس تستمتع بكده وتتابع أخبار النجوم وأرقام التريندات وغيرها».

المقارنة بين أعمال عمرو سعد ومحمد رمضان

واستكمل: «يمكن كان أكبر سؤال بيواجهنا وإحنا بنستعد لتقديم مسلسل السنة دي هو نوع الدراما اللي هنقدمها، إيه اللى هنقدمه السنة دي مختلف عن مستوى الشكل والمضمون، واللي هيقدمه المخرج محمد سامي، وهو كاتب أعماله، ويفكر أن يقدم شئ مختلف عن السنوات الماضية».

وأضاف عمرو سعد: «وهذا تحدي مش بسيط، وبالفعل مع النقاشات الكتير، هو المخرج قرر يختار دراما هو نفسه بيقول إنه أول مرة يقدمها، جديدة عليه وعلى جميع الأبطال المشاركين، والناس هتتفاجآ بالمسلسل عندما يشاهدوه، ويارب يعجب الجمهور ويحبوه على قد المجهود اللي بذلناه خلف الكاميرا، وعايز أوجه رسالة للأستاذ مارك زوكربيرج، وأقوله الله يسامحك ياسطا، ارتاحت كدة يا عم، أديك عومت العالم في نهر من الأكاذيب».

واختتم: «وآخر حاجة عايز أقولها بجد أنا بعبر عن فرحتي وفخري إن السنة دي هقف قدام عدد ضخم من النجوم الكبار اللي لهم تاريخ، بشكرهم وفرحان إني جزء منهم، وسعيد إننا هنقدم للجمهور عمل يسعدهم ويقدم لهم شيء مفيد».