عمرو وهبة: أنا الشيطان بيخليني استنصح مش أوفر

عمرو وهبة، حرص على أن يحث متابعيه وجمهوره بتوفير بعض الرفاهيات من أجل مساعدة المحتاجين كي يستطيعوا شراء أساسياتهم، وذكر الفنان عمرو وهبة طريقة يتبعها لمساعدة المحتاجين وتفاعل معها الجمهور.

عمرو وهبة يتحدث عن توفير الرفاهيات

كتب الفنان عمرو وهبة عبر حسابه بموقع التواصل الاجتماعي فيسبوك: «بوست جد على غير العادة، بصرف النظر عن الكومنتات اللى هتقول ياعم انت فنان وانت بتاخد ملايين وانت مالك بالكلام ده وكل الحاجات اللي مش صح دي بس هقول برده، مؤخراً بسبب ظروف معظم الناس بمختلف طباقتهم واحتياجتهم وانا منهم بدأ كل واحد فينا يفكر ازاي يوفر وازاي يستغنى عن المصاريف اللى ممكن يستغنى عنها بس أنا اكتشفت إن أنا الشيطان بقى بيخليني استنصح مش أوفر، يعنى بصرف عادي مصاريفي اليومية اللي مش كلها الصراحة أساسية أو ليها بديل بس بوفر في الخمسة جنيه اللي بدفعها للى بيحطلي بنزين أو بقلل التيبس اللي بسيبه فى مطعم كلت فيه برقم مش شوية والخ من نوعية المصاريف دي ومع إنى بكره السنتحة والفلوس الإتاوه اللي ملهاش لازمة دي وبتعصب من اللي بيرمى نفسه على بريريز العربية عشان يليطها بفوطته اللى مداقتش طعم المياه فى حياتها وبقول دول ناس مش بيعملو حاجة وبيقرطسونا بس لما فكرت، ووارد جدًا اكون بفكر غلط، قولت يا عم سيبهم يقرطسوك بمزاجك وخد انت الثواب».

وتابع عمرو وهبة، حديثه وقال: «يعنى وهو ممكن يكون بالنسبالك بيستليح بس فى الأخر الأكيد إن هو محتاج الفلوس دي ولما بسمع حد بيقولى يا عم الناس دي بيعملو فلوس قد كده بسخن ومش بديهم وبعدين بفكر كده بيعملو كام يعنى، الفين جنيه فى الشهر تلات الف خمس تلاف عشر تلاف، حتى أكتر من كده، ما هو مش بياخدهم منك ويطلع يعمل كايت سيرفينج فى راس سدر ماهو هيجيب بيهم أكل وشرب وبرده مهما زاد ده بقى رقم عادي والقرشين اللي هتدفعهم دول اكيد مش هيفرقوا معاك بس وارد يفرقو معاه أو مع اللي بيصرف عليهم».

طريقة عمرو وهبة لمساعدة المحتاجين

واختتم عمرو وهبة حديثه، وقال: «حد هيقولي طبعًا خلاص يا سيدي انت كده بتشجع على الاستلاياح وروح ادفعهم لمستشفى ولا لدار ولا لأي حد مريض أو اي حاجة كده هقوله معاك بس أنا كعمرو ومش بقول إنه اي حد يعمل كده، أنا بقيت يوميًا بصحى الصبح افتح ابلكيشن فوري اختار اي جهه تبرعات واحط أى رقم اتبرع بيه حتى لو عشره ولا عشرين جنيه، وثبتها كشيء أساسي فى بدايو يومي لحد ما خلاص بقت حاجة مش بنساها الحمدلله خالص وعامة يعني أنا نصحت بيها كام حد حواليا وكلمهم كلمونى وقالولى دى سحر والله احنا عملنا كده وربنا فتحلنا فى كذا وكذا، مش شرط طبعاً يحصلك زيهم بس وارد جداً ربنا بسببها يمنع عنك حاجه وحشه كانت هتحصل وانت متعرفش، الخلاصه وفر شوية من رفاهياتك عشان غيرك يعرف يجيب شوية من اساسياته وشكرًا».

عمرو وهبة يكشف عن شخصيته في جروب الدفعة

عمرو وهبة يسخر من عودة فيريرا للزمالك

برسالة غريبة.. عمرو وهبة يحتفل بعيد ميلاد والده

عمرو وهبة يحتفل بـ16 سنة مع زوجته: كلها رجولة

النشرة الفنية..أشرف عبد الباقي مع «الكبدة الكاذبة» وعمرو وهبة فرحان بالعيدية.. وطليق ياسمين الخطيب يلتزم الصمت