كشف المطرب عمر كمال عن تفاصيل رحلته من العمل في محطة بنزين ومحل أحذية والعمل في النظافة، إلى عالم الشهرة والنجومية، مؤكدا أنه يحرص دائما على تذكير نفسه ببداياته الصعبة حتى لا يصاب بالغرور أو يتعالى على الناس بعد نجاحه.
وقال المطرب عمر كمال، خلال لقائه مع الإعلامية نهال طايل في برنامج «تفاصيل»، المذاع على قناة «صدى البلد 2»: «الحمد لله كل اللي أنا كنت عايزه أخدته، أنا مش مغرور خالص، أنا بكسر نفسي دايما، وبقول يا رب كبرني في عيون الناس وصغرني في نظر نفسي».
وأضاف: «بقعد أقول لنفسي: إيه يا عمر يا بتاع البنزينة، إيه يا عمر يا بتاع محل الجزم، يا اللي كنت عامل نظافة، وطي نفسك شوية، ولما جالك ده هتتعوج على الناس عشان ربنا رزقك بشبشب».
وأوضح: «كنت داخل فرح لابس بدلة بيضا، فحد من إخواتي الناس الشقيانة حب يتصور معايا، وحط إيده على كتفي من الحب، كان شغال وإيده عرقانة شويتين، فالبدلة بصمت، الشيطان جالي فاتضايقت، قلت لنفسي: إيه يا اللي كنت بتحلم إن الفكهاني اللي تحت بيتكم يعرفك، لما ربنا كرمك ووصلت تضايق من الناس؟ ده أنت من الغلبان ده وهو اللي عملك».






