غادة والي ترد على اتهامات سرقة أعمال فنان روسي: كابوس وحصلي مشاكل في الولادة

ياسمين حمادة 17 مايو 2023 | 09:54 مساءً

ردت الفنانة التشكيلية غادة والي مصممة الجرافيك، على اتهامات سرقة أعمال فنان روسي، في آخر أعمالها لصالح إحدى شركات المياه الغازية.

تصريحات غادة والي

قالت الفنانة غادة والي في تصريحات تلفزيونية لها: «أول مرة أطلع وأتكلم فيها طول حياتي، السنة اللي فاتت تعرضت لأزمة إعلامية كبيرة ووقتها كنت بولد وحصل لي مشاكل في الولادة».

وتابعت: «وكنت في المستشفى ومعرفتش أرد بكل قوتي بس المرة دي أنا هرد، أنا زي أي حد تعرض لتنمر إلكتروني وتأثرت نفسيًا ومهنيًا لمدة السنة اللي فاتت كلها، وللمرة الثانية أتعرض للتنمر الإلكتروني وهذا بالنسبة لي كابوس مش قادرة أشوفه تاني».

غادة والي

غادة والي ترد على الاتهامات

واستكملت غادة والي تعليقها: «بيحصل لي من غير ما أعرف أتكلم وأدافع عن نفسي، أنا من ساعة ما رجعت من إيطاليا بعد ما خلصت الماجستير، كل هدفي في الحياة إزاي أخلي التصميم يحيي التراث المصري وده مش أول مشروع بعمله بيتكلم عن نفس الفكرة، ولا تاني ولا تالت ولا رابع ومش أي حد بيقول أي اتهام نصدقه من غير ما يكون فيه أي دلائل، وحملة شركات المياه الغازية اتعملت في 2018».

وقالت أيضًا: «أنا رسمت الرسومات دي بإيدي ودي كانت أول مرة الشركة تقتبس من فنان مصري ومتاخدش تصميم من نيويورك أو مكان تاني عالمي، ومن كتر نجاح الحملة الشركة طلبت مني أعمل مسابقة في كلية فنون تطبيقية مع الطلاب بنفس الفكرة إزاي يحيوا تصميم مصري بيحبوه، وده أحلى حاجة شوفتها في حياتي لأن هدفي كان بيتحقق لأنهم حسوا بانتماء لتاريخنا وتصاميمنا الملهمة الجميلة اللي مش محتاجين نقلد حد ولا نوصل لحاجة برة».

واختتمت: «وأنا بحترم كل الفنانين داخل وخارج مصر وبحترم القانون المصري والقضاء المصري لأنه كان قضاء عادل، وهلجأ له لأن أنا تعبت علي بناء شركتي خلال 15 سنة وأني أوصل لثقة العميل ومش هسيب حقي وبحترم شغلي اللي فات واللي جاي».

غادة والي