غادة والي تعترف: أنا مش فنانة تشكيلية وهذا ردي على الفنان الروسي

ياسمين حمادة 21 مايو 2023 | 10:43 صباحاً

تحدثت غادة والي مصممة الجرافيك عن أزمة اتهامها بسرقة أعمال فنان روسي مرتين على مدار عامين، قائلة: «أنا مش فنانة تشكيلية مش ببيع لوحات في معرض».

تصريحات غادة والي

قالت غادة والي في تصريحات تلفزيونية لها: «أنا مصممة جرافيك بعمل شغل بيزنس بناءً على طلب العميل، ولو انا أخدت واقتبست من الفنان الروسي يبقى إحنا الاتنين واخدين من بيكاسو، والقضية إن الفنان الروسي هو اللي سارق مننا وبالنسبة لي بيهين البلد في اتهاماته لي».

وتابعت: «لأن التكعيبة اللي عنده واللي إحنا ماشيين بيها من بيكاسو وهو قال إنه واخد من رسومات رومانية، إنما أنا واخدة معبد هابو بالأقصر، وأنا والفنان الروسي واخدين من نفس المدرسة ونفس الجداريات الفرعونية، وأنا بعترف إننا الاتنين واخدين من مدرسة واحدة».

غادة والي

رد غالي والي على اتهامات السرقة

وعلقت على اتهامات سرقة لوحة محطة كلية البنات، قائلة: «المبلغ اللي أخدناه من تصميم اللوحة الجدارية لمحطة كلية البنات بمترو الأنفاق 77.042 جنيه مش ملايين زي ما بيقولوا، اللوحة الجدارية تمت إزالتها بس فيه جداريات تانية في المترو في العباسية وهوليوبوليس والأوبرا ومحطات تانية لسة موجودة».

واستكملت مصممة الجرافيك غادة والي قائلة: «والشركة الفرنسية هي اللي طلبت مننا نطلع الفراعنة سود علشان لون السيراميك، بس مكنش في مخنا إن الفراعنة سود ولا الموضوع ده خالص، واستعنا في عمل جدارية محطة كلية البنات بالرسومات اللي موجودة في معبد فيلة ومقبرة الملكة نفرتاري ونب آمون بالأقصر».

غادة والي والفنان الروسي

وقالت أيضًا: «أما الفنان الروسي مخدش زي اللي إحنا خدناه، الجدارية بتاعت محطة كلية البنات بتاعتي ورسومات الفنان الروسي هما الاتنين شبه بعض، علشان إحنا الاتنين واخدين من نفس المدرسة الفرعونية، والشركة الفرنسية المسئولة عن إدارة المترو فسخت العقد معانا قبل مشكلة جدارية محطة كلية البنات لأننا طلعنا في برنامج واتكلمنا عن شغلنا من باب الترويج».

واختتمت غادة والي حديثها: «الفنان الروسي مش مسجل لوحته في الفيبو الخاصة بحقوق الملكية الفكرية، ودورنا على كده ملقناش حاجة، وأنا في الأساس مش ناقلة منه ولا سرقت حاجة وأنا عارفة إن اللي دبحني في الموضوع ده اعتذار المترو بس مرجعوش ليّ، وأنا تألمت جدًا لما شوفت مشهد إزالة الجدارية وتأثرت نفسيًا».

وعن صمتها عن الاتهامات العام الماضي، قالت: «أنا كنت بولد وفي المستشفى، حالتي الصحية مسمحتش أطلع وأرد ولما قدرت أتعافى كان الموضوع اتقفل، ففضلت أسكت، وأنا مش قريبة حد، ومعرفش حد هنا خالص عشت برا كتير، محدش ساندني أنا مسنودة من ربنا وشغالة بقالي 15 سنة».

زفاف غادة والي وحسن ابو الروس زفاف غادة والى وحسن ابو الروس