في أول ظهور على يوتيوب.. حلا شيحة: «القرآن غير حياتي.. وهحكي تجربتي معاه»

أعلنت الفنانة حلا شيحة عن إطلاق قناتها الرسمية على موقع 'يوتيوب'، في رسالة مؤثرة نشرتها لمتابعيها، حيث أعربت فيها عن سعادتها الغامرة بالتواصل معهم من خلال هذا الفضاء الرقمي، مشيرة إلى رغبتها في الحديث عن تجربتها الروحية وعلاقتها بربها، وخصوصًا ارتباطها العميق بالقرآن الكريم.

وتحدثت حلا شيحة في أول فيديو طرحته عبر رقناتها على يوتيوب، قائلة: 'عاملين إيه؟، يا رب تكونوا بخير، مش قادرة أوصف لكم سعادتي قد إيه، إني عملت قناة يوتيوب، وفرحانة جداً، وكل شوية بدخل ببص على تعليقاتكم، سعيدة بيها، بشكركم جداً، يا رب تبقى في ميزان حسناتكم كلكم، وبدعي لكم نفس الدعوة وزيادة، وربنا يتقبل منا جميعاً'.

وتابعت حلا شيحة، مشيرة إلى أن التواصل مع الجمهور والحديث عن الله عز وجل هو أكثر ما يسعدها ويشغل تفكيرها، قائلة: 'وسعيدة قوي إني بتكلم عن ربنا، وسعيدة إن في ناس بعتالي بتقولي: 'حلا، إحنا حابين طريقتك وكلامك وكده، اتكلمي أكتر وكده'. فأنا حاسة إن دي أكتر حاجة بحبها، وأكتر حاجة بتشغلني دايماً، بتشغل بالي وبتشغل فكري وبتشغل قلبي، حب ربنا سبحانه وتعالى، والتفكر في آيات ربنا سبحانه وتعالى'.

وكشفت حلا شيحة، عن نيتها أن يكون الفيديو الأول على قناتها مخصصًا للحديث عن القرآن الكريم وتجربتها الخاصة معه: 'فقعدت أفكر، ليه ما نعملش أول فيديو يبقى بخصوص، يعني نتكلم فيه عن القرآن الكريم؟ وسر ارتباطي أنا بالقرآن الكريم، وسر هدايتي أنا بيه كانت بالقرآن الكريم، وإيه الحاجات اللي أثرت فيا قوي خلتني أحب القرآن جداً وغيرت حياتي كتير. وحتى لما بعدت عن ربنا سبحانه وتعالى، برضه قدرت أرجع، لأن الآيات جوايا يعني. مفيش حد بيحس حاجة حقيقية بتهزه من جوه، بالذات كلام ربنا سبحانه وتعالى، وبيبعد، ولو بعد يبقى عايز يرجع تاني'.

وأضافت مؤكدة على طبيعة الفيديو: 'فأنا سعيدة جداً، أتمنى إن الفيديو ده يبقى، يعني اللي إحنا هنعملوه إن شاء الله، يكون فيه كلام عن القرآن الكريم. مش من منطلق داعية أو مفسرة، من منطلق التجربة. ومش هنقف طبعاً عند كل الآيات ونتدبرها كلها، لأ، عند البعض الآيات اللي أثرت في مشواري أنا وخلتني أبقى دلوقتي أنا هنا'.

كما تحدثت حلا عن رسائل الدعم التي تتلقاها من متابعيها، خاصة ممن يستلهمون من تجربتها قوة في العودة إلى الله: 'وناس كتيرة بتبعتلي بتقولي: 'حلا، إحنا حاسين إنك ما شاء الله قوية، ويعني إزاي قدرتي تخطي كل ده وترجعي تاني تقربي من ربنا تاني؟ دي حاجة مش سهلة'. فسبحان الله، يعني هو مفيش حاجة سهلة، هو ربنا اللي جميل، وربنا اللي بيهدينا. وربنا سبحانه وتعالى بيقول يعني: 'استهدوني أهدكم'. فإحنا بنطلب الهداية دايمًا من رب العالمين، ولازم نحسن الظن في الله مهما يكون حالنا، لازم نحسن الظن في الله'.

واختتمت حلا شيحة حديثها بالدعوة لمتابعتها في أولى حلقات القناة، التي ستحمل عنوان 'رحلتي مع القرآن الكريم'، قائلة: 'فتعالوا نعمل أول حلقة عن القرآن الكريم، وبدايتي مع القرآن الكريم، ويبقى حاجة جميلة برضه للناس اللي دايماً بتبعتلي: 'حلا، إحنا بنقرأ القرآن بس مش بنفهمه'. فممكن أحط نقط كده صغيرة تخلينا نحس بالمعاني أكتر، نفهمها أكتر بطريقة سهلة، فيا رب يجعله صادق وخالص ليه، واستنوني إن شاء الله بقى في الحلقة الجاية هنتكلم عن القرآن الكريم، رحلتي مع القرآن الكريم، بحبكم جداً، السلام عليكم ورحمة الله'.