قصة أزمة إبراهيم سعيد مع محمد صلاح.. «حاططني في دماغه وبيحاربني»

أطلق إبراهيم سعيد لاعب الأهلي والزمالك ومنتخب مصر السابق، تصريحات نارية، خلال الساعات الماضية، أكد خلاله أن محمد صلاح لاعب ليفربول وقائد الفراعنة، يقود حملة ضده.

إبراهيم سعيد، قال عبر برنامجه التلفزيوني، إن محمد صلاح بـ«يلعب معايا لعبة مش حلوة»، مضيفًا «أنا بحب المواجهات، ودي لعبتي، وفي مواقف كتير بتأكد أنه شاغل دماغه بيا، وهو لو حطني في دماغه ممكن ده يبعده شوية».

ووجه إبراهيم سعيد حديثه لمحمد صلاح، قائلًا: «الرزق ده بتاع ربنا، الحاجات اللي بتحصل دي عيب، والجيم ده هتخسره اللي بتعمله بيوصلني، لما اتكلمت عليك اتكلمت في مواقف مع منتخب مصر ماتكلمتش على محمد صلاح لاعب ليفربول».

وأضاف إبراهيم سعيد «الأساليب اللي بتحصل معايا مش كرة، بس مش مشكلة أنا معاك وحاول مرة تانية وتالتة ورابعة، وممكن تكسب وممكن تخسر، بس أنا بحب اتعامل في الحاجات دي بطريقة أفضل».

وواصل تصريحاته «أكتر واحد وقف معاك هو إبراهيم سعيد، وأنت عارف ومتأكد لأن مفيش حاجة بتفوتها وبتتابع كل حاجة، وسيبك من كلام مش بتابع، أنت بتتابع كل حاجة، ومستغرب إن إبراهيم سعيد بينتقدك، أه بنتقدك، أنا كابتنك».

واستكمل «أنت مافرحتش الشعب المصري، وأنا نفسي أشوفك رافع كأس أمم إفريقيا، زي ما بتتصور بالحذاء والدروع مع ليفربول، لأن ده إنجاز شخصي ليك مع منتخب مصر، وأنا عارف إن أنت ممكن يكون معندكش الإحساس بتاع منتخب مصر عشان مش مركز مع المنتخب، ومش عايز حد ينتقدك».

واختتم تصريحاته «نفسي أشوف محمد صلاح بتاع زمان، المتواضع اللي كان بيبقى ماسك المصحف في إيده، وسيبك من الكتب والحاجات اللي بتنزلها دي مابتأكلش عيش، عايز أشوف محمد صلاح اللي بيقدر كل الناس».

وظهر إبراهيم سعيد، ضيفًا مع الإعلامي مدحت شلبي، في برنامجه التلفزيوني، ليوجه له الأخير سؤالًا عن ما قاله بشأن محمد صلاح، قائلًا: «أنت قولت محمد صلاح حاططني في دماغه»، ليرد الأخير: «أه من وقت ما اتكلمت عن إصابته وأدائه في ليفربول غير المنتخب وأنا بتعرض لهجوم كبير».

ورد مدحت شلبي، على إبراهيم سعيد، قائلًا: «تفتكر محمد صلاح فاضي يحطك في دماغه؟»، هو ما دفع الأخير للرد قائلًا: «أنا إبراهيم سعيد وأنا كابتنه، محمد صلاح كان بيتفرج عليا وأنا بلعب كرة، مع احترامي لصلاح مهما كان اسمه بس أنا إبراهيم سعيد».