«قلب ترابيزة».. شيماء سيف تكشف سبب طريقة ردها على اعتذار أيتن عامر

حرصت الفنانة شيماء سيف على كشف السبب بشأن طريقة ردها على اعتذار الفنانة أيتن عامر، بعد جدل تصريحها «مش هتخلفي غير أما تخسي».

قالت شيماء سيف عبر تصريحات تلفزيونية: «اللي خلاني أرد بالطريقة دي إن أنا مكنتش شايفة إن أيتن بتعتذر، أنا كنت شايفة قلب ترابيزة وفيه كلام كتير أوي اتقال كدب».

سبب طريقة رد شيماء سيف على اعتذار أيتن عامر

وتابعت: «بدليل إنها بتقول هي افتكرت من 6 سنين لما كنا بنتكلم على موضوع التخسيس، طيب أنا من 6 سنين عمري في حياتي ما كنت أتخيل إني أعمل تكميم ولا حتى أخس، وفكرة التكميم دي اتاخدت في أسبوع بعد مشكلة رجلي ولما مي كساب قالتلي على التكميم خدت القرار على طول».

واستكملت شيماء سيف حديثها: «اللي حصل إننا كنا قاعدين كلنا في المطار ومسافرين وكنا قاعدين وفيه ناس وهي جت وبدأت تكلمني وتقول شيماء إنتي إيه موضوع الخلفة قلتلها لسة ربنا ما كرمش، فقالتلي تسمعي مني يا شيماء إنتي مش هتخلفي غير لما تعملي تكميم وتخسي».

وأضافت: «أنا اللي ضايقني مش كلامها عن الخسسان وكدة، اللي ضايقني إنها كانت فاكرة إن المشكلة من عندي وإني لازم أخسلها، وأصلًا المشكلة كانت من عند جوزي وإحنا مخبيين والحوار حصل قدامه، ده كل الموضوع وتاني حاجة، هي بتقول إحنا بقالنا 6 سنين وبتقعدي معايا وحسستني إني واكلة وشاربة في بيتها، وده محصلش، إحنا خلال الـ 6 سنين ما شوفتهاش غير 4 مرات وكل اللي كان بينا فيهم سلام ربنا، بدليل يا أيتن وأنا أحب أفكرك إن آخر مرة كنا مسافرين على الطيارة رايحين السعودية وأنتي قاعدة في كرسي وجنبك فاضي وأنا في كرسي تاني وجنبي فاضي ومقعدناش جنب بعض علشان عارفة كويس أوي اللي حاصل».

تصريحات شيماء سيف عن أيتن عامر

وقالت شيماء سيف أيضًا: «وإنتي يا أيتن كنتي عارفة كويس أوي إن الكلام كان عليكي من أيام برنامج نيشان ودخلتي وعملتيلي إلغاء متابعة، وبعدين عملتي متابعة تاني في نفس الدقيقة علشان كنتي فاكراني عملتلك بلوك، ولما كل واحدة فينا قعدت لوحدها ده علشان أنتي فاهمة كويس أوي إيه اللي في القلوب.. أنا مش باكل عيش وملح مع حد وأنا شايلاله في قلبي حاجة ويمكن علشان كدة بخسر ناس كتير ومش ماشية بمبدأ إن في الشغلانة دي المصالح بتتصالح، لأ أنا مش كده، أنا عندي الدنيا يا أبيض يا أسود، أنا قلت في البرنامج إن أيتن اللي قالت كدة علشان فيه ناس تانية اتظلمت ولولا كدة مكنتش قلت اسمها ولا قلت هي مين، والسبب الأكبر بقى اللي خلاني رديت بالطريقة دي».

واختتمت: «لما نزلت الفيديو أنا دخلت شوفت الكومنتات لقيت واحدة كاتبلها إن احنا فاهمين إنك قصدك تنصحيها وكدة، ف أيتن ردت وقالتلها اه دول هيخلوا الواحد يحرم!، لا يا أيتن أنا مرضتش أقول إنك بتكدبي علشان ما أحرجكيش لكن حقيقي حقيقي الكلام اللي أنتي قلتيه محصلش وعمومًا عند الله تجتمع الخصوم».