كريم عبدالعزيز: مفيش حاجة اسمها نمبر وان.. والتمثيل بالإنجليزي كان أصعب تحدي

تحدث الفنان كريم عبدالعزيز عن كواليس ومفاجآت فيلمه الجديد «7dogs»، وتفاصيل الإصابات التي تعرض لها خلال التصوير.

قال كريم عبدالعزيز في المؤتمر الصحفي لفيلم 7dogs إنه خضع لتدريبات لمدة 3 أشهر قبل بدء التصوير، والأكشن يعتمد في المقام الأول على قدرة الممثل.

وتابع: «فيلم 7DOGS كان محتاج مجهود بدني مختلف عن الأفلام اللي عملتها، وقالولي أتمرن قبل تصوير الفيلم بـ 3 شهور قولتلهم أنا مش ملاكم ولما صورت لقيت أني محتاج 3 شهور كمان، والأكشن محتاج لياقة بدنية وصحة ومختلف عن أي أدوار نفسية، الأكشن معتمد على إمكانية الممثل وعدم خوفه ولياقته البدنية».

وكشف الإصابات التي تعرض لها، قائلًا: «وحصل لي قطع في السمانة في بعض المشاهد، مسخنتش كويس وكان المفروض أفتح سبرينت فجأة من ثبات لفجأة جامد فحصلي إصابة».

وعلق كريم عبدالعزيز على جدل «الأعلى أجرًا ونمبر وان»، قائلًا: «مفيش حاجة اسمها نمبر وان من وجهة نظري الشخصية، مع احترامي لزملائي، ولكننا مشفناش ده في أمريكا، في فيلم النهاردة عامل إيرادات عالية وفيلم السنة اللي بعدها عامل إيرادات أعلى، دي حاجة مش بتاعتي ولا مدرستي أنا راجل بشتغل والتوفيق من عند ربنا»..

وقال عن تعاونه مع الفنان أحمد عز: «السينما عمل جماعي، وفكرة أن أبطال العمل نجمين عاليين وكويسين ده في صالح الفيلم وصالح المتفرج، أنا وأحمد عز في ثالث تجربة بينا في تفاهم وكيميا وشخصيتنا قريبة من بعض، وخلفيتنا السينمائية واحدة واحترامنا للشغلانة واحد، ده كله أول واحد بيستفاد منه المخرج».

وعلق كريم عبدالعزيز على التمثيل باللغة الإنجليزية في فيلم 7DOGS، قائلًا: «ممكن أحفظ الجملة علشان أقولها، ولكن هي الفكرة همثل إزاي بالإنجليزي؟ لازم أوصل الإحساس بهذه اللغة وأنا مصري، فكنا بنقعد نحفظ الجملة ونجوزها للدراما والشخصية، بحيث أن تطلع مش مجرد أني بقول الجملة ولكن بأدي الجملة بالإنجليزي ودي أصعب حاجة بالنسبة ليا».

وأضاف: «الفيلم كله ضرب نار وصواريخ وانفجارات وطائرات، وعمري ما عملت أكشن بهذا المجهود والاحترافية، وهم نفس الفريق الذي عمل على فيلم john wick، وكل شيء منفذ باحترافية شديدة جدًا، وتعاملت مع تكنيك جديد في التصوير في 7dogs وهو أنني أحمل الكاميرا بنفسي وأركض بها، وهذا شيء لم أره من قبل بصراحة».