كريم فهمي: مسلسل أزمة منتصف العمر كان هيتعرض في رمضان
![صور](https://i0.wp.com/cdn.elbaladtv.net/wp-content/uploads/2023/11/elaosboa92357.jpg?resize=250,150&ssl=1)
أعلن الفنان كريم فهمي، استئنافه تصوير مسلسله 220 يوم، بعد فترة توقف والذي كان من المقرر أن يشارك به في السباق الرمضاني الماضي 2024، بجانب الكشف عن تفاصيل أعماله الفنية المقبلة.
وقال كريم فهمي، في تصريحات تلفزيونية: هنستأنف تصوير مسلسل 220 يوم، وكل حاجة ربنا بيبقى رايد الخير فيها، مسلسل أزمة منتصف العمر أصلًا كان هيتعرض في رمضان وبسبب التأجيلات ربنا كتب له أنه ينزل بعد رمضان علشان ينجح النجاح ده.
وتابع كريم فهمي: كل حاجة بعد نزول العمل ده بتاع ربنا والمنتج والقناة أو المنصة اللي بيتعرض عليها العمل، أنا اللي عليا إني أعمل اللي عليا سواء كتابة أو تمثيل.
وكشف الفنان كريم فهمي، تفاصيل أعماله الفنية القادمة، قائلًا: في حاجات معروض دلوقتي تحت الإنشاء، وفي مشروع دماغ ألماظ أنا كتبته بقالي سنتين أو تلاتة ده بنحضره وإن شاء الله ربنا يكرم في الأيام اللي جاية واختيار الأبطال لأنه بطولة جماعية مش بطولتي لوحدي، والبطل اللي قدامي كان أحمد فهمي، ولكن بسبب مواعيده ومواعيدي مختلفة هيكون في نجم كبير بإذن الله.
وأوضح كريم فهمي، أنه يعمل على مشروع فيلم كوميدي، خلال الفترة الحالية بجانب فيلم دماغ ألماظ، قائلًا: هيكون في فيلم تاني كوميدي إن شاء الله أنا مخلص كتابته، ده بإذن الله بنحضر له دلوقتي.