لاعب الزمالك يشكو من إهمال ناديه: 5 شهور قاعد في البيت

أبدى يوسف حسن لاعب فريق الزمالك، استيائه من الإهمال الذي تعرض له بعد إصابته التي تعرض لها خلال مشاركته مع الفريق في الموسم الماضي، والتي أبعدته عن الملاعب.

وكتب يوسف حسن، عبر حسابه بموقع التواصل الاجتماعي «فيسبوك»: «أنا بس هتكلم كلمتين والواحد ساكت متكلمتش من ساعة ما اتصابت أنا ولا حد بيسأل فيا ولا حد بيطمن عليا بدون ذكر اسمي أنا ماقصرتش مع حد ولا عمري حد شاف مني حاجة وحشة».

وأضاف «أولًا أنا اتصابت في ماتش المقولون العرب في الكاحل تمام اتعالجت يومين وبعدين روحت منتخب الشباب اتخبط فيها تاني والإصابة تشخصه إني عندي قرحة في الكاحل محتاجة ليزر وكل ما أكلم حد يقولي النادي مافيهوش فلوس أنا بقالي خمس شهور قاعد في البيت مفيش حد عارف يعملي عملية بـ150 ألف جنيه لدرجة إني قولت عاوز فلوسي وأنا هعملها على حسابي».

وتابع لاعب الزمالك «تاني مرة أقولها حسبي الله ونعم الوكيل في اللي قال مزمنة أنت كده بتدمرني أنا ماعملتش حاجة وحشة اللي قال كده يثبت إنها مزمنة وأنا هوري له التقرير والأشعات».

وواصل تصريحاته «نفسي أفهم ليه بيحصل كده أنا ماقصرتش بنقطة عرق واحدة وأنا بلعب مع نادي الزمالك لعبت خمس ماتشات كسبنا الخمسة الحمد لله يعني ماقصرتش بأي حاجة».

واختتم يوسف حسن «عامة أنا في انتظار حد مسؤول في النادي يكلمني وهعمل العملية وهرجع أحسن من الأول بإذن الله

وأنا بحب جمهور الزمالك من قلبي فعلًا شكرًا».