لقاء الخميسي: فقدت النطق 15 يوما بسبب التحرش.. وأصدقائي الولاد أكتر من البنات

ياسمين حمادة 14 يناير 2023 | 09:14 مساءً

تحدثت الفنانة لقاء الخميسي عن موقفها مع التحرش، بجانب علاقات الصداقة في حياتها، ورأيها في قائمة الزواج بعد الجدل الكبير الذي أثير مؤخرًا.

تصريحات لقاء الخميسي

قالت لقاء الخميسي في تصريحات تلفزيونية لها: «عندي صحاب ولاد كتيرة أوي صحابي الولاد أكتر من البنات ومحمد متقبل دا، لأن فيه ناس أعرفهم من قبل ما أعرفه، ومنهم 2 مقربين وكمان فيه ناس في الوسط».

واستكملت لقاء الخميسي قائلة: «طالما العلاقة في مقامها الصح فتمام، مفيش مشكلة، كنت وقعت في الحب في عمر 15 عامًا، بعد أن تعرفت على الولد أثناء دراستي وكان آخرنا في الحب نظرات إنما الجيل الجديد دلوقتي عامل تألق».

أول حب في حياة لقاء الخميسي

وتابعت لقاء الخميسي: «أول حب في حياتي كنت 15 سنة،و كان تلميذ عند بابا وكان أبيضاني وعينيه زرقة وكيوت ولذيذ وفاكرة أول مرة سلم عليا فيها وعينه جت في عيني قعدت 3 أيام مش عايزة أغسل إيدي».

واستنكرت الفنانة فكرة قائمة الزواج، موضحة أنها لم توقع عليها هي وزوجها محمد عبدالمنصف، لاعب المرمى الشهير وجهزا منزلهما بالاشتراك مع بعضهما.

لقاء الخميسي عن القايمة

أضافت لقاء الخميسي : «أنا ضد قايمة الجواز، يعني إيه قايمة؟ يعني جبنا الأجهزة والعفش وكل حاجة، وفي الآخر اتخانقنا، الأجهزة دي هتعملي إيه؟ ما حياتي خلاص باظت، ما تغور، ومفكرناش فيها ولا عمرنا فكرنا، إحنا الاتنين ساعدنا بعض في تجهيز البيت».

وقالت أيضًا: «وفي حاجات مجبنهاش لحد دلوقتي ومبفتكرش أصلًا أنها مش عندي، والأهالي اللي بتبررها إنها حق، فحقك الإنساني أهم من المادي، أني أكون زوجة بتحبني بتحترمني بتحن عليا، فين المشكلة إن مين هيصرف لما يبقى قادر هو يصرف، احنا بنشارك مشاعرنا وحياتنا هنتكلم عن الفلوس والقايمة؟».

لقاء الخميسي والتحرش

قالت الفنانة لقاء الخميسي إنها تعتبر نفسها مستقلة بنفسها، ولا يستطيع شيء أن يوقفها، مضيفة: «أكثر ما يواجه الفتيات في المجتمع، هو سلب حقهن في التعبير عن نفسهن، ويلحقن بهن صفة الضعف، ولكن الحقيقة أن المرأة أقوى بكثير من الرجل».

أوضحت أنها تعرضت للتحرش وكانت المرة الأولى لها بعد سفرها إلى مصر، للالتحاق بمعهد التمثيل العالي، حيث كانت مقيمة خارج مصر، وكانت تخرج من المنزل مبكرًا في حوالي الخامسة صباحًا، لبعد المسافة بين منزلها والمعهد.

واستكملت لقاء الخميسي أنه في أحد الأيام في الترم الأول لها في الجامعة، رأت منظرًا من رجل، عرضها لصدمة نفسية، أفقدها النطق لمدة 15 يومًا، حيث لم تكن تستوعب ما حدث، وامتنعت عن الخروج من منزلها تمامًا.

لقاء الخميسي وزوجها

وأضافت في كلامها عن التحرش: «المرة الثانية كنت في المعهد، ونازلة من العربية واحد معدي بعجلة، جريت وراه بالعربية وفتحت الباب، وبالشنطة اللي في إيدي وفيها حاجات تقيلة نزلت فيه ضرب، والمرة الثالثة وأنا متجوزة ومخلفة كان في راجل أكيد مجذوب ماشي في الشارع من غير هدوم».

وتحدثت عن علاقتها بزوجها قائلة: «محصلش إن جوزي خيرني في يوم من الأيام بعلاقتي بيه والشغل، لأن علاقتي بيه أهم من أي حاجة في الدنيا حتى لو كانت الشغل».

واختتمت لقاء الخميسي كلامها: «وبشوف الرجالة اللي بتوقف أي ست عن شغلها إن ده ضعف إنساني داخلي، هو مش واثق من نفسه وعايز يبهت على اللي قدامه، عايز يشوفها ضعيفة ويشوف نفسه قوي، لكن لو هو قوي مش هيحتاج يقعدها».

لقاء الخميسي