لقطات من العرض الخاص لـ ولاد رزق 3 بالسعودية.. عمرو دياب يخرج عن صمته ومفاجأة عن هنيدي وكريم عبد العزيز

ياسمين حمادة 17 يونية 2024 | 11:35 مساءً

شهد العرض الخاص لفيلم ولاد رزق 3 بالسعودية اليوم الاثنين 17 يونيو 2024، ثاني أيام عيد الأضحى 2024 العديد من المفاجآت واللقطات والتصريحات المثيرة للجدل.

أقيم في البداية مؤتمر صحفي لصناع وأبطال فيلم ولاد رزق 3 داخل ساحة البوليفارد بالرياض، وتحدثوا عن تفاصيل التجربة وكواليسها، ومفاجآت الجزء الرابع.

العرض الخاص لفيلم ولاد رزق 3 بالسعودية

أعرب الفنان أحمد عز عن سعادته الكبيرة بافتتاح الجزء الثالث في مدينة الرياض بالمملكة العربية السعودية، بعد عرضه في مصر.

وقال أحمد عز بالمؤتمر الصحفي لفيلم ولاد رزق 3 بالرياض: «إحنا سعداء جدًا أننا بنفتتح الفيلم هنا في العيد، دي حاجة بتسعدنا وتشرفنا، الفيلم ده كان من أصعب الأجزاء اللي اتعملت، ولولا دعم تركي آل الشيخ مكنش الفيلم طلع بالشكل ده والشراكة المصرية السعودية بتفيد الفيلم وبتخليه يقترب من المستوى العالمي».

وتابع: «الفيلم العربي لازم يقرب وأنا دايمًا بتحمس وعندي الفكر إني أقدر أعمل زي الخواجة بالدعم والتنظيم والمادة اللي بقت أساسية في الإنتاج علشان تواكب».

العرض الخاص لفيلم ولاد رزق 3 بالسعودية

أبطال فيلم ولاد رزق 3

وقال الفنان كريم قاسم: «الجزء الثالث على قد ما هو مختلف هو محافظ على روح ولاد رزق، والاختلاف إن الجزء الأول والثاني فيه عمليات كتير في الأول وبعدين عملية كبيرة، لكن الجزء الثالث عملية كبيرة قائمة في الرياض، والتصوير في السعودية واتبسطت جدًا بالناس اللي قابلنهم واشتغلنا معاهم الناس رحبت بينا».

واستكمل: «وهنا في البلوليفارد كان في تأمين علشان لو حصل تزاحم أو تدافع الناس كانت بتساعدنا ومرحبة بينا ومحترمين ده، صورنا ليلة كاملة والناس ما ضيقتناش الناس كانت مبسوطة بوجودنا وما عطلتش الشغل، وبوجه الشكر كل الناس على مساعدتهم لينا وتراحبهم بينا».

بينما تحدث الفنان عمرو يوسف عن نجاح الجزء الثالث من فيلم ولاد رزق، وكشف صعوبات العمل، قائلًا: «أول أيام التصوير كنا بنصور في الماتش الحقيقي بتاع تايسون فيوري بطل العالم في الملاكمة، وكان في متخصصين من برا بيصوروا الماتش ده».

وأضاف: «وكان المفروض نحط الكاميرات بتاعتنا والإضاءة في وقت الحقيقي اللي بيتلعب فيه الماتش وده كان صعب ومفيش مكان للكاميرات بتاعتنا، وكان لازم نبقى جاهزين طول الوقت، والتسهيلات دي لولا دعم هيئة الترفيه مكناش هنقدر نعملها، وسلسلة أفلام ولاد رزق حققت نجاحًا كبيرًا جدًَا من الجزء الأول والناس مرتبطين بالفيلم وأبطاله وبيحبوهم، وكنا متوقعين نجاح كبير للفيلم ومتحمسن له وكانت مفاجأة كبيرة من عند ربنا سبحانه وتعالى إنه وفقنا وقدرنا نحقق رقم تاريخي وخيالي، وسعداء بالموضوع ده وتعبنا جدا في الفيلم وطالع بشكل كويس، والناس اللي اتفرجت عليه في مصر دخلته أكتر من مرة واللي كان بيقدر يحصل على تذكرة تانية لأنه صعب جدًا كان بيدخل الفيلم تاني وسعيد بالنجاح وسعيد إننا صورنا هنا».

العرض الخاص لفيلم ولاد رزق 3 بالسعودية

مفاجآت فيلم ولاد رزق الجزء الرابع

وقال آسر ياسين في المؤتمر الصحفي لفيلم ولاد رزق 3 بالرياض اليوم الاثنين: «أنا سعيد بوجودي في الرياض جدًا، التصوير هنا كان مريح جدًا وكان فيه كل الدعم والتسهيلات، الشايب بالنسبة لي دور أنا بحبه جدًا».

وتابع: «واللي بيتفرج على ولاد رزق بيبقى نفسه يبقى جزء منه، سعيد جدًا بالنجاح والتجربة والشايب يمكن يبقى فيلم لوحده أو يبقى موجود في الجزء الرابع محدش عارف».

ومن جانبه، قال المخرج طارق العريان: «دعم هيئة الترفيه خدنا في مستوى تاني من الصناعة قدرنا نرتقي بالأكشن ونعمل أكشن مختلف مش بس بإمكانيات مادية ولكن نقدر نصور في أماكن ما ينفعش نصور فيها».

واستطرد: «خدنا وقتنا لأن الأكشن محتاج تكلفة ووقت لأنه مش حاجة ممكن نرتجلها لازم دراسة وتحضير وفي الآخر ممكن ما تظبطش فترجع تعيدها تاني ودي إمكانيات مش سهلة نعملها إلا بدعم هيئة الترفيه.. الصناعة محتاجة تسويق، والتسويق اللي اتعمل لـ ولاد رزق مختلف وهو سبب من أسباب الإقبال الفظيع عليه».

وعلق الفنان سيد رجب، على مشاركة نجوم النادي الأهلي في الترويج لـ فيلم ولاد رزق 3، قائلًا: «أنا مش شايف تعارض بين فنان زملكاوي وأهلاوي وبين نكتة أو إفيه بيتعمل في الفيلم وأنا رافض التعصب بشكل عام، وأنا زملكاوي وبحب الأهلي وبعشقه وفي النهاية لو الأهلي لعب حلو بشجعه ولو لعب بره مصر بشجعه وأتمنى أن الأهلاوية يشجعوا الزمالك لو لعب حلو أو بره مصر».

العرض الخاص لفيلم ولاد رزق 3 بالسعودية

عمرو دياب في العرض الخاص لفيلم ولاد رزق 3

وكان للفنان عمرو دياب ظهور خاص في عرض فيلم ولاد رزق 3 بالسعودية، وحرص على الخروج عن صمته والإشادة بالعمل، بالإضافة إلى التعليق لأول مرة بعد أزمة الصفعة الشهيرة.

أشاد عمرو دياب بفيلم ولاد رزق 3، مؤكدًا أن العمل يحمل رسائل كثيرة مهمة، معلقًا عبر تصريحات تلفزيونية: «الدمج بين المتحدة وهيئة الترفيه بالمملكة العربية السعودية، سيساعد في تطوير صناعة الفن، وهذا ظهر في إنتاج فيلم ولاد رزق 3 القاضية».

واستكمل قائلًا: «كل أبطال وصناع الفيلم أصدقائي وأنا فخور بهم عمل مختلف وسعيد بمشاهدته.. ولاد رزق إنتاج بالصبغة العالمية ويفتح نفسي اتفرج عليه، بمعرفتي بالمستشار تركي آل الشيخ هو دايمًا يعمل كل الأعمال بصبغة عالمية».

واختتم عمرو دياب: «هناك تعاون وإندماج مصري سعودي كبير في المجال الفني وهو ما أدى إلى حالة من الازدهار الفني التي نعيشها حاليًا.. وأقول لجمهوري.. من 35 سنة وأنا معنديش غير جمهوري وأنا بقدركم وبحبكم أوي»، ومازح عمرو أديب، الهضبة قائلا: «العضلات لسه مستمرة»، ليرد عليه عمرو دياب قائلًا: «يا عم إرحمني».

وشهد العرض الخاص لفيلم ولاد رزق 3 مفاجأة من العيار الثقيل، فجرها المستشار تركي آل الشيخ رئيس هيئة الترفيه، موضحًا أنه جاري العمل حاليًا على أعمال جديدة بدعم من هيئة الترفيه، منها فيلم الاسترليني بطولة محمد هنيدي وجزء جديد من فيلم ولاد رزق، بالإضافة إلى جزء جديد من فيلم الفيل الأزرق بطولة كريم عبد العزيز.

وحضر العرض الخاص عدد من النجوم بجانب أبطال وصناع فيلم ولاد رزق 3، ومنهم أحمد فهمي، وليلى علوي، ونيللي كريم، وهالة صدقي، وشيكو، وأحمد إبراهيم، وأيتن عامر وآخرين.

العرض الخاص لفيلم ولاد رزق 3 بالسعودية