ما هي القواعد الثلاث التي حددتها ياسمين عز للفتيات للتعامل مع الزوج في المطعم؟

إسماعيل هاني 19 فبراير 2023 | 08:16 مساءً

وجهت الإعلامية ياسمين عز، رسالة للفتيات حددت خلالها ثلاثة قواعد للتعامل مع الزوج في المطعم، وشرحت هذه القواعد موجهة حديثها للبنات.

وقالت ياسمين عز في تصريحات تليفزيونية: لو قاعدين في مطعم وجوزك واخدك يأكلك ويشربك، مينفعش وهو قاعد جنبك تنسحبي من لسانك وتتجردي من شعورك وتتكلمي قبله مع الجرسون.. لو حابة تطلبي حاجة وجهي كلامك لجوزك وقولي حبيبي فرعوني ممكن تتطلبلي مثلا نص بطة بالبرتقال ومعاها عصير برتقال.

ياسمين عز: لازم تبصي لجوزك وتقولي العصير مش أحلى منك

وتابعت ياسمين عز: لازم تبصي لجوزك وتقولي العصير حلو بس مش أحلى من جوزي.. ولو جوزك أبو الكرم نسي سهوا محفظته أو فلوسه في البيت، إياكي تطلعي فلوس من شنطتك وتديهاله قدام الناس، دي حاجة مخجلة ومهينة للراجل.

ياسمين عز استكملت حديثها قائلة: علشان تحافظي على كرامة جوزك، تروحي مكان الدفع وتقولي أنا عاملة مفاجأة لجوزي وعازماه، أو تديله الفلوس من تحت المفرش أو تسيبي شنطتك بشياكة على الكرسي جنبه، وتقولي بعد إذنك أنا رايحة الحمام ممكن تحاسب.

نصائح ياسمين عز للبنات

قالت ياسمين عز في رسالة جديدة منها للبنات: «مينفعش تعملي نفسك فاهمة أكتر منه.. ومتسأليهوش عن الطريق وانتوا ماشيين هو معاه بوصلة رباني».

واستكملت ياسمين عز كلامها: «لو إنتي قاعدة جنب جوزك متتنفسيش وهو بيتنفس ولو قاعدين بتتكلموا مينفعش تقومي تروحي الحمام بدون ما تستأذنيه .. الحمام مش أهم منه!!».

وأضافت: «هل معنى كلامي إنك تكتمي نفسك وتموتي، بعد الشر عليكي افهمي معنى الجملة، يعني لما يكون متعصب وصوت نفسه عالي من العصبية متتنفسيش إنت كما وتنفخي بصوت عالي معاه، ده هيزود شحنة السلبية والنكد وهتقوم خناقة».

وتابعت ياسمين عز: «ولو إنتو قاعدين مع بعض بتتسامروا وتتكلموا، مينفعش فجأة تقومي في نص كلامه وتمشي بدون استئذان تروحي الحمام، الحمام مش أهم منه يا مدام.. ممكن تستنيه لما يخلص كلامه، ويقوم هو الأول وبعدين تقومي وراه، أو لو إنت مستعجلة تقولي بلطف من غير ما تقطعي كلامه حبيبي هروح أعمل حاجة».

الإعلامية ياسمين عز

وقالت أيضًا: «أو هروح أغسل إيدي عشان حاسة إنها محتاجة تتعطر شوية، ومينفعش تتكلمي مع الجرسون في وجود جوزك ولو معزومين بره ونسي محفظته لازم تحاسبي بالطريقة دي عشان تحافظي على صورته قدام الناس!!».