مجدي سعيد: بتضايق من قلة الشغل وسأرفض مسلسل الحشاشين في هذه الحالة

تحدث الفنان مجدي سعيد عن رأيه في اتجاه الفنانين لعمل المشاريع بعيدًا عن الفن، قائلًا: «لو الفنان يقدر يعمل مشروع جنب الفن ياريت معرفش يرضى باللي ربنا قسمله بيه».

تصريحات الفنان مجدي سعيد

قال الفنان مجدي سعيد في تصريحات تلفزيونية له: «عملت مشروعين والحمدلله فشلوا، عملت مزرعة أرانب وعملت كافيه لمده سنه وبيعته، المفروض الفنان ملوش إلا فنه و رغم إني أنا شخص يشهد لي بالذكاء أو بالتجارب إنما فشلت».

واستكمل: «لأن أنا شخص معندوش خبرة في الحاجة اللي بيعملها ومهما كان عندي دراية وخبرة يفرق عن حد دارس، وأنا حاليًا بدرجة مدير عام في هيئة المسرح عندي معاش ومعاشي بكيف نفسي بيه، والفترة اللي مفيهاش شغل بضايق فنيًا مش ماديًا».

مجدي سعيد

مجدي سعيد مسلسل الحشاشين

وقال أيضًا: «بيتقالي إنت فينك يا عم والسؤال ده طول ما أنت ماشي الناس بتسأله، نفسي أمثل حاجة بحبها أنا عايز اتمتع قبل ما امتع المتفرج، ومسلسل الحشاشين بعتولي عليه من السنة اللي فاتت، وإن شاء الله يكون حاجة كويسة، هما صوروا في قبرص وكان المفروض هيتعرض رمضان 2023 لكن هيبقي في رمضان 2024».

وتابع مجدي سعيد حديثه عن مسلسل الحشاشين: «وبتعشم أكون محطوط في حاجة كويسة لأني لو مش محطوط في حاجه كويسة مش هشتغل، ودكتور بيتر راعاني أوي وأنا بحبه أوي وبيفرق لما بكون المخرج حابب الممثل، في مخرجين بيكرهوا الممثل أو هو شخصيًا بيكون نفسه يمثل ودي زمايلنا شافوها يعني».

مجدي سعيد يتحدث عن الوسط الفني

وقال الفنان مجدي سعيد أيضًا: «اللي بيكون فاهم في حرفية الشغلانه أوي بيحسها، في مخرج بيكون معندوش إلا النجم والنجمة والباقي ده كله جاي يكمل، وفي مخرج يقولك إيه أنت عندك أحسن من كده».

وأضاف: «أنا مطلوب لحد اللحظة دي لكن بحاسب نفسي، بشوف هل ينفع ابني أو اختي يشوفوا ده، لو لقيت مينفعش لايمكن أعمله دايمًا إحساسي هو اللي بيوجهني قبل الأجر وقبل حاجات كتير لأن عندي ضمير شوية ودي مهمه جدًا لأن الفن رسالة ومش أي رسالة دي رسالة سامية».

واختتم الفنان قائلًا: «اللي بيعتزل ده أصلًا مش فنان ده داخل الشغلانه كده، ولما أقول إن ده حرام طب عملتوا ليه من الأول، إنما تعمله وترجع تقول حرام وترجع وتقول سألت لقيته كويس مينفعش، اللي مبيطلبش أو مبيشتغلش موهبته ضعيفة، فعلًا في مخرجين جداد لكن ده ميخلنيش اشتكي، الفنان كرامة الفنان عزة نفس ومينفعش أقول بيتي اتخرب أنا تلاجتي فاضية في ايه! مبتطلبش خلاص شوف شغلانة تانية».

مجدي سعيد