مجدي عبدالحليم: محمد رمضان خلف بوعده.. وخايف الناس تنساني

كشف الفنان مجدي عبدالحليم، تفاصيل موقف جمعه بالفنان محمد رمضان، قائلا إن الأخير وعده بالعمل معه.

وتابع مجدي عبدالحليم في تصريحات تلفزيونية له، أن محمد رمضان خلف بوعده معه، مضيفًا: «مفيش حد بياخد أجره في القطاع الخاص، ممكن آخر دفعة لو بيصور فيلم ولا حاجة تروح عليك».

مجدي عبد الحليم ومحمد رمضان

واستكمل: «كنت بعمل فيلم الكنز مع محمد رمضان ووعدني إني اشتغل معاه تاني وخلف بوعده، شكله نسي وأنا مش عارف هيفتكر إيه ولا إيه ربنا معاه، والزرق بتاع ربنا ومجدي مش نكرة وموجود دايمًا ومش هيتنسي، لو لينا نصيب نتقابل أنا ومحمد رمضان هنتقابل».

وتحدث مجدي عبدالحليم عن مسيرته الفنية، قائلًا: «عملت مع الفنان سعيد صالح أفلام كانوا بيسموها أفلام المقاولات ميعرفوش يعملوها دلوقتي، واشتغلت معاه مسرح وكان نفسي أشتغل في مسرحية العيال كبرت وكان نفسي أحقق النجومية ومحققتهاش لغاية دلوقتي».

مجدي عبد الحليم

تصريحات الفنان مجدي عبد الحليم

وقال أيضًا: «الإنسان مفتقد ذكائه علشان يكون نجم، والمطبات كانت بسبب إني عندي بجبر خاطر ناس كتير ونسيت نفسي، والفن مفيهوش جبر خواطر».

أما عن بداياته الفنية، تحدث الفنان مجدي عبد الحليم قائلًا: «مسرحية وجهة نظر مع الفنان محمد صبحي، كانت تميمة حظي.. أنا بدأت مسرح من مركز الشباب وقصور الثقافة، ودخلت على أستاذ نور الشريف في مسرحية اسمها لعبة السلطان ومن ساعتها مخرجتش من المسرح القومي».

وتابع: «أنا التمثيل في دمي من وأنا طفل في المدرسة، وكان عندنا سينما في البلد بنشوف فيها أفلام فريد شوقي ومحمود المليجي، لغاية ما جيت القاهرة ودخلت فريق التمثيل.. دخلت مركز شباب الجزيرة، ومراكز الشباب وقصور الثقافة هي اللي بتشبع رغبة الفنان، والفنان محمد صبحي شافني من خلال مسرحية عفريت لكل مواطن، ومسرحية لعبة السلطان، وشاركت معه في مسرحية وجهة نظر وهي تميمة حظي وهي اللي عايشة مع الناس، وتعتبر بدايتي الحقيقية في المسرح».

أولاد مجدي عبد الحليم

وأضاف مجدي عبد الحليم: «التمثيل سعي ولكن كل حاجة لها مناسبة، وأنا اشتغلت مع كل نجوم المسرح، واشتغلت مع الفنان فؤاد المهندس في فوازير عمو فؤاد، وعلاقتي به كانت كويسة جدًا والشغل معاه ممتع، وعملت معاه مسلسل السرايا».

كما أعرب عن قلقه من نسيان الجمهور له بسبب قلة أعماله، معلقًا: «المسرح هو البيت الأول، والتلفزيون الشغل فيه صعب، والمسرح هو مصدر رزق ثابت وأنا طلعت معاش دلوقتي الحمد لله، والمسرح زي ما هو له جمهور، ولكن الكتابة اتغيرت ومبقاش في مسرحية 3 فصول بقى في الاستكتشات والضحك السريع، والجمهور ميقدرش يقعد لـ مسرحية 3 فصول، وعلشان كده إحنا في مسرحية طيب وأمير فاصلين».

وأضاف: «أنا عندي رضا وقناعة بأن الإنسان هياخد رزقه، إحنا أُمرنا أن نسعى والنجاح من عند ربنا، واتخضيت إني عملت 350 عمل، مش هنشتغل قد ما اشتغلنا، أنا اشتغلت مع كل نجوم مصر، وبداية نجوم كبيرة زي محمد رمضان كانت قدام عيني، واللي يقدر يقف على المسرح ويطلع الضحكة هو اللي هيقدر في السينما والتليفزيون، والمسرح هو عمود الفن.. والأولاد قالولي شوف شغلانة تانية يا بابا علشان الدنيا والظروف، قولتلهم مش هينفع والزرق من عند ربنا».

واختتم الفنان مجدي عبد الحليم: «بس أنا قدرت في الفترات اللي ميكونش فيها شغل أجيب شباب وأدربهم وأعمل زي ورش تمثيل، عملت مسلسلات وفوازير وكل اللي نفسي فيه، ورش التمثيل مش مربحة ولكني كنت دايمًا بكتفي إني أجيب حق المصور، هي فترة لغاية ما أشارك في موضوع كويس، وأنا كنت بكلم أستاذ محمد صبحي على الشغل، وأكتر حد كان بيقف معايا في الفترات العصيبة دي الدكتور أشرف زكي».

مجدي عبد الحليم