محامي محمد رمضان يكشف تطورات جديدة في قضية ابنه

كشف المحامي أحمد الجندي محامي محمد رمضان، تطورات قضية نجله، وكيف تأثيرها على الطفل.

قال محامي محمد رمضان عبر تصريحات تلفزيونية: «مفيش خناقة أطفال في نادي بيلعبوا مع بعض، والأطفال تنمروا على ابن محمد رمضان وقالوا له أنت أسود زي أبوك».

تطورات قضية نجل محمد رمضان

وتابع: «فحصل خلاف بين الأطفال وتدافع، موضوع عادي جدًا بيحصل في النادي.. علشان والد الطفل نجم الموضوع اتصعد».

واستكمل محامي محمد رمضان: «والطرف الثاني اشتكى وراح نيابة ومحكمة، ومؤخرًا في الجلسة كانوا جايين يطلبوا تعويض، واضح إن الهدف الأساسي يطلبوا تعويض طمعًا في محمد رمضان مش أكثر».

تصريحات محامي محمد رمضان

واختتم: «والأهداف من وراء هذا الكلام ابتزاز ومساومة محمد رمضان، وده ظهر في الجلسة إمبارح، ومحدش يكره الخير، لكن أسرة الطفل هدفها مادي، إزاي ندفع حاجة على حاجة محصلتش، وإلا هنفتح المجال لأي حد يبتز محمد رمضان، ويتوجه ببلاغ ضده أو ضد أي حد من أهله».

وعن توجهه للطعن على حكم المحكمة بإيداع نجل محمد رمضان دار رعاية، قال: «هو حكم غيابي صدر في غياب الدفاع، من غير مناقشة الطفل ولا سماع دفاعه، ونعتبره إخلال بحق الدفاع واستعجال في البت في الدعوى دون سماع الأطراف وتمحص وجوه الشهود ومراجعة المستندات والكاميرات، وهنتقدم بشكوى لهيئة التفتيش القضائي، وهنطعن على الحكم بالطرق القانونية، وبإذن الله تتحدد جلسة جديدة ويحضر علي نجل محمد رمضان، وبإذن الله يثبت براءته، ومحمد حزين بيقول مش كفاية اللي بيتعمل معايا ابني كمان، وياريته راجل كبير، ده طفل عمره 10 سنين».