محمد رمضان: أنا عمري مش صغير.. وده سبب رفضي أعمل أفلام بسيطة بعد كده

أكد الفنان محمد رمضان أن فيلمه الجديد "أسد" يمثل نقلة مهمة في مشواره الفني، مشيرًا إلى أنه أصبح أكثر نضجًا واختيارًا في أعماله مع تقدمه في العمر، وأنه لا يسعى لتكرار نفسه أو تقديم أفلام خفيفة لمجرد الوجود.

وقال محمد رمضان في تصريحات تليفزيونية: "أنا دلوقتي بكبر وبنضج، عندي 37 سنة، ماقدرش أعمل أفلام صغيرة لأن أنا مش صغير في السن، وكل مشروع ليه وقته، وفيلم أسد جه في وقته المناسب".

وأضاف: "أنا تفرغت تمامًا وغبت عن الدراما والسينما عشان فيلم أسد، ومش هشتغل غير بمواصفات الفيلم ده حتى لو قعدت في البيت 10 سنين، لأنه اتعمل عشان يكون أساس لمرحلة جديدة في حياتي الفنية".

وتطرق رمضان للحديث عن بداياته الفنية، مشيدًا بالفنانة الكبيرة يسرا، قائلًا: "رحلتي بدأت معاها، هي اللي رشحتني لفيلم إحكي يا شهرزاد، ومن أوائل الناس اللي ساهموا في اسم محمد رمضان، زي عمر الشريف وحنان ترك وسعيد صالح الله يرحمه".

يُذكر أن فيلم "أسد" يشارك في بطولته ماجد الكدواني، رزان جمال، علي قاسم، ركين سعد، كامل الباشا، وأحمد عبد الحميد، وهو من تأليف خالد وشيرين ومحمد دياب، وإخراج محمد دياب.