محمد شميس: عمرو دياب يطور كل سنة وألبوم آمال ماهر لا يتماشى مع أجواء الصيف

تحدث الناقد الفني محمد شميس عن تقييمه لألبومات صيف 2025، ومن بينها ألبوم عمرو دياب وألبوم آمال ماهر.

قال محمد شميس في لقائه مع الإعلامي شريف نور الدين، ببرنامج أنا وهو وهي، المذاع على قناة صدى البلد: «عمرو دياب كل سنة يحاول يقدم حاجة مختلفة، فالناس تقعد تقول مش ده عمرو اللي متعودين عليه، وعمرو بتاع زمان انتهى».

ألبوم عمرو دياب في صيف 2025

وتابع: «وأكتر أغاني نجحت جماهيريًا حتى هذه اللحظة من ألبوم عمرو دياب بعد حوالي 3 أسابيع، خطفوني هي أغنية مقسوم، مقسوم يوناني، عمرو دياب أول من ابتكر مفهوم الشكل المقسوم اليوناني منذ سنة 1988 في أغنية نعشق القمر في ألبوم ميال، فهو كل سنة يطور في الحتة بتاعته دي لحد ما وصلنا لخطفوني، لو بنتكلم على أغنية ابتدينا، أغنية فلامنكو أو نيو فلامنكو يعني فيها هاوس وفلامنكو مع بعض، مزج يعني، هو برضو من الناس اللي أسسوا الشكل ده من (ويلموني والعيون)، لو بنتكلم مثلًا عن أغنية يا بابا أغنية ميكس بيحب يعمله بين الشرقي والغربي».

وأضاف الناقد محمد شميس: «طبعًا عنده مشروع موسيقي، وأغلب الفنانين الصراحة عندهم مشاريع غنائية بس الناس مابتحسش ده أحيانًا لأن له علاقة بنا كصحفيين أو كنقاد مابيبقاش عندنا حركة نقدية حقيقية ترصد».

واستكمل: «مقياسك للنجاح ترجع لأصل الفنان ذات نفسه، والمشروع اللي بيقدمه قايم على إيه وتحلل فيه، عمرو دياب عنده قواعد ثابتة مابيغيرهاش دايمًا موجودة معاه في كل الألبومات، هو مطور منها السنة دي، وفي حاجات جديدة عليه تمامًا زي أغنية ابنه عبدالله، والاتنين لازم يغنوا سوا عشان الأغنية تطلع بالكمال الفني ده».

ألبوم آمال ماهر في صيف 2025

وعن آمال ماهر، قال: «طبعًا مبسوط بعودة آمال ماهر، هي من الأصوات المهمة وعاملة ألبوم عظيم، بس لا يتماشى مع أجواء الصيف، أغلب الأغاني دراما، وأغاني جميلة جدًا، وأغاني تقدم مفهوم الست اللي بتتعامل مع الراجل بشكل به ندية».

وأضاف: «طبعًا لازم ترجع يعني، إحنا عندنا كام آمال ماهر؟، أنا نفسي الأصوات بتاعتنا المهمة تفضل موجودة يعني آمال وشيرين عبدالوهاب وأنغام وكل الناس اللي هي دي قوتنا الحقيقية، لازم يبقوا موجودين وبشكل مستمر يارب مايتوقفوش تاني، الحمدلله مصر عندها موهوبين كتير جدًا، وأتمنى يبقى عندنا ألبوم كل سنة مانستناش سنتين أو تلاتة ما بين كل ألبوم والتاني، بغض النظر بقى عن أسباب الانقطاع لكل الفنانين يعني».