محمد علي رزق عن الراحل تامر ضيائي: اللي حصل معاه يوم وفاته شيء مهين خلاه ينفجر

حرص الفنان محمد علي رزق الدفاع عن الفنان الراحل تامر ضيائي عقب انتشار فيديو للراحل وهو بيتشاجر مع فرد أمن بأحد المستشفيات حتى توفى الفنان.

محمد علي رزق والراحل تامر ضيائي

وكتب محمد علي رزق عبر حسابه بموقع التواصل الاجتماعي فيسبوك: 'شهادة لوجه الله… أنا أعرف تامر ضيائي من 2004 من أيام فرقة عين الشمس… و دخلنا مركز الإبداع سوى في 2006 وفضلنا صحاب لغاية ماربنا استرد أمانته، تامر ضيائي طول عمره إنسان محترم وعلى مدار 20 سنة عمري ماشوفت تامر متعصب أو شخص متجاوز… اللي حصل مع تامر يوم وفاته شئ مهين خلاه ينفجر'.

وتابع محمد علي رزق: 'تامر بقاله 17 سنة بيراعي زوجته في مرضها عمرنا ماسمعنا عنه إنه عمل مشكلة وكان صابر و راضي بقضاء ربنا، تامر لم يتجاوز الدور زي ماقالوا بشهادة سوزان زوجته إنهم كانوا واخدين رقم 421 و لما جيه الرقم اللي قبلهم بدأوا يقربوا من الباب ولما وصل كان رقمه جيه الأمن منعه وقاله فيه ناس هتدخل الأول فتامر رفض إن حد يتجاوز دوره و من هنا بدأت المشكلة'.

وأضاف محمد علي رزق: 'تامر انفجر علشان مراته التعبانة اللي قاعدة مستنية دورها عشان تاخد الجلسة فيلاقي الأمن بياخد فلوس علشان يدخل ناس قبل دورها، تامر ما عملش حاجة غير إنه اتمسك بحقه ولما لاقى الراجل بيتعامل معاه بشكل مهين انفجر، حسبي الله ونعم الوكيل، ربنا يرحمك يا تامر و يجعلك من أهل الجنة'.