محمد علي رزق: مفيش داعي للنفسنة والخناق بين النجوم.. وأنا ضد فكرة «رقم واحد وجدل الأعلى مشاهدة»

تحدث الفنان محمد علي رزق عن بداياته الفنية، وأصعب أدواره، وموقفه من الخلافات والجدل بين النجوم في الوسط الفني.

قال محمد علي رزق في لقائه مع الإعلامية شيرين سليمان ببرنامج سبوت لايت، المذاع على قناة صدى البلد: «أدين دائمًا بالفضل للأماكن اللي طلعت منها أداب مسرح جامعة حلوان ولأستاذي وأبويا خالد جلال ولمركز الإبداع».

وتابع: «وميزة مركز الإبداع عند خالد جلال، لأي طالب الدفعات كلها بنبقى أصدقاء وأصحاب وخايفين على بعض، وبنبارك لبعض لما حد فينا ينجح ولو اعتذرنا عن أعمال بنرشح بعض وفي ضهر بعض».

واستكمل محمد علي رزق: «لا أحمل ضغينة لأي حد من زمايلي لأن عندي يقين شديد إن الأرزاق ربنا موزعها علينا مفيش داعي للخناق والنفسنة ومين سابق مين».

وأكد أنه أصبح نضجًا بسبب الخبرات الحياتية، والتي أثرّت معه في حياته العملية وأدواره، مضيفًا: «اختلفت على كل المستويات الإنساني والعملي على مدار السنين وبحاول على قدر الإمكان إني أصول لأكبر قدر من التلقائية والجمهور ميحسش إني بمثل».

وفيما يخص أصعب أدواره، قال محمد علي رزق: «شخصية مصطفى درغام في صيد العقارب أكتر دور تعبني وأنا بذاكره وبمثله وبعدما خلصته لأنها كانت شخصية مركبة ومريض بشلل دماغي، فكنت بفكر هيتكلم إزاي وياكل إزاي ويمشي إزاي وبعدها نتمرن على شكل الشخصية جنب التمثيل».

وعلق محمد علي رزق على جدل الأعلى مشاهدة، قائلًا: «ده ممكن يكون هدف للجهات الإنتاجية وحقهم لكن من وجهة نظري ده مش لازم يوصل للممثل، المفروض الممثل يدور على نجاحه فنيًا والتجاري أتركه للجهة الإنتاجية، وفي النهاية كلنا زملاء وأخوات وأصحاب فأنا ضد رقم واحد واتنين ومقصدش أي حد وشايف كل الأعمال الفنية حلوة وكل شخص له ستايله وناجح ونجم في حتة سواء أحمد العوضي أو كريم الشناوي»