محمد علي رزق: منتخب مصر أثبت للعالم أنه كبير.. ولو خدنا حقنا لانتهت المباراة 3-2 لصالحنا

أشاد الفنان محمد علي رزق بالأداء الذي قدمه منتخب مصر أمام الأرجنتين، مؤكدًا أن اللاعبين كانوا على قدر المسؤولية، وأن المنتخب أثبت للعالم مكانته، مشيرًا إلى أن ما أحزنه هو ما وصفه بالظلم الذي تعرض له الفريق في الدقائق الأخيرة.

وقال خلال مداخلة هاتفية مع الإعلامية نهال طايل في برنامج 'تفاصيل' المذاع على قناة 'صدى البلد2': 'أنا بالنسبة لي الماتش من قبل ما يبدأ متقبل إن إحنا نخرج خسرانين، ولما  حد يقول لي إيه رأيك، أقول له إحنا رايحين نقابل بطل العالم، فأنا لو كابتن حسام حسن هقول للاعيبتي: أنا مش مضغوط، هم اللي مضغوطين، هم اللي مطلوب منهم يكسبوا، انزل العب كورة، انزل أثبت للعالم إنك لعيب مهم، انزل أثبت للعالم إن منتخب مصر ده منتخب كبير، ومش مهم النتيجة'.

وأضاف: 'اللاعيبة كلهم كانوا رجالة، وكانوا قد المسؤولية، وإمبارح حطوا اسم منتخب مصر في حتة حلوة جدًا قصاد العالم كله، هيثم حسن، مصطفى شوبير، ياسر إبراهيم، وكلهم كانوا جامدين، وكلهم كانوا شاطرين، محمد صلاح كابتن حقيقي لمنتخب مصر، لعيب له ثقله في الملعب، لو رجليه الاتنين بايظين ونزل الملعب اللعيبة بتخاف منه'.

وأوضح: 'هو اللي زعل الواحد في آخر 10 دقائق الظلم اللي إحنا تعرضنا له، أنا كنت أتمنى إن إحنا ناخد حقنا، إحنا منتخب مصر لو كان خد حقه كانت النتيجة هتبقى 3-2 لمنتخب مصر، مش لمنتخب الأرجنتين'.