محمد نور يكشف سر خوفه من الموت وسبب انسحاب نادر حمدي من فريق واما

كشف الفنان محمد نور تفاصيل نشأته في بيت فني، وعلاقاته بفريق واما.

قال محمد نور عبر تصريحات إعلامية: «اللي بيعرفني من قريب بيشوف حاجات مختلفة خالص غير شكلي، واللي بيشوفني بيقولي أنت قد إيه طيب وبتحب الناس وكل اللي ميعرفنيش يفتكر حاجة تانية».

تصريحات محمد نور

واستكمل: «الشغلانة بتاعتنا دي غريبة جدًا كل واحد قبل ما بينام يقعد يقول مين حفلته فين ومين كسب كام ومين راح السعودية وأنا لسه مروحتش، أنا الوحيد اللي في الشغلانة دي مليش دعوة بأي حد، وأي حد بيعمل حاجة حلوة أنا أول واحد ببعتله مبروك».

وأضاف محمد نور: «كل الناس اللي في جيلنا كلهم صحابي ولما تيجي سيرتنا يقولوا نور ده شيك أوي ملوش دعوة بحد».

علاقة محمد نور بأسرته

وتابع: «مبعرفش أعمل أي حاجة من غير ما أكلم أمي وهي قاعدة معايا في نفس البيت في الدور اللي تحت وأنا نازل وطالع أدخل أشوفها محتاجة حاجة ناقصة حاجة ومبقولهاش أنا مسافر كتير عشان بتتوتر ووجودها في حياتي مطمئن ومخليني أحس إني مفيش مشكلة في أي حاجة وكلمة السر عندي في دعوة أمي ليا وأي حد بيدعيلي».

وعن حقيقة توثيق جنازة والده، قال محمد نور: «أنا معرفش مصورتهاش لأنه كان وقت كورونا وبعدين أبويا الله يرحمه كان أقرب حد ليا وكان آخر 6 أو 7 شهور تعبان جدًا وقت الكورونا ومكنش فيه شغل ومكنش فيه فلوس وكنا قاعدين في البيت، ووقت ما توفى الموضوع كان صعب بالنسبالي وأنا موثقتش حاجة الواحد كان في إيه ولا إيه، وقعدت 15 أو 20 يوم مش مصدق ومش مستوعب لأن أبويا كان طيب وأطيب واحد وفي حياته عمره ما زعقلي، وأنا عيالي علي وعمر بنفخهم وبضربهم وبجري وراهم».

وكشف مخاوفه، قائلًا: «مشكلتي من وأنا صغير ناس صحابي صغيرين ماتوا فالموضوع ده بيخوفني جدًا وبخاف على الناس اللي حواليا والتجارب دي سابتلي أثر مرعب وموضوع الموتوسيكل بالذات أكتر حاجة فيها إنذار، والإنذار بقى مرتبط بالموت».

واختتم حديثه بفريق واما، وقال: «واما ناجحة جدًا لحد ما جه الوقت اللي أنا بقيت أغني لوحدي وفهمي بيمثل، وإحنا رجعنا وكنا لسه في السعودية وعندنا جولة في أمريكا وكندا، أما نادر حمدي فضل إنه يخليه في التوزيع وهو أخونا وصاحبنا وعشرة عمرنا، ومحصلش أي خلاف بينا وهو مركز في التوزيع وناجح جدًا فيه».