محمود التهامي يهاجم هاني شاكر: «احنا منشدين ولينا تاريخ وأصول»

هاجم المنشد محمود التهامي، الفنان هاني شاكر نقيب الموسيقيين، بسبب أزمته مع النقابة، وإدعائها عليه بإقامة حفل في أسوان، ولم يتواجد التهامي في هذا التوقيت هناك، على حد قوله.

محمود التهامي يتهم نقابة الموسيقيين

وكتب التهامي عبر صفحته الرسمية بموقع «فيسبوك»، قائلا: «كلمنا نقابة المهن الموسيقية أن اللي بيحصل ده لا يليق بالنقابة ولا بينا واحنا كبار ومينفعش بعض الموظفين يزوروا باطل ويدعو ضدنا هذا الامر».

وأضاف: «كان المفروض نقيب الموسيقيين ياخد إجراء جاد يليق بنا وبه وبتاريخ النقابه وانا قعدت سنه أناشد، يا جماعه أنا مكنتش في محافظة أسوان في هذا التوقيت».

وقف محمود التهامي

وتابع محمود التهامي: «كان نفسي نقيب الموسيقيين يدخل ويوقف المهزلة اللي حاصله دي من موظفين النقابة، ويكبر ويعرف قيمتنا وقيمه المنشدين والفنانين ولكن للأسف لم يفرد لنا الوقت اللي أفرده للمهرجانات وكل شويه النقيب هاني شاكر طالعلنا مع حمو بيكا وحسن شاكوش وعمر كمال ياعم احنا منشدين والله والبلد بتتشرف بينا، ولينا تاريخ ولينا أصول والعالم بيتشرف بينا معلش يعني خد من وقتك شويه وحقق، شوف الموظف المزور اللي أدعي  علينا باطلا هو عاوز ايه»، مشيرا: «نقابة المهن الموسيقية خالفت اللائحة، لما يبقا عضو عامل عنده مشكلة يعمل ايه، يبعتله انذار واحد،  يبعتله إنذارين، وبعد كده يحوله للتحقيق، لا تم إيقاف محمود التهامي لمشكله في أسوان بدون تحقيق».

محمود التهامي يتعجب من اهتمام هاني شاكر بالمهرجانات

واستطرد: «لما طلبنا من النقابه أنهم  يبعتو يجيبو الناس بتوع اسوان علي حسابي الشخصي، حصل نوع من التعنت، مضيفا: «بدأ الإعلام طبعا يتكلم في هذا الامر وتصدرت مواقع البحث إيقاف محمود التهامي، بقيت لما اسافر بره والناس بتكرمني في العالم بره بيكلموني ازاي نقابة المهن الموسيقية بمصر توقف منشد زي حضرتك ومعلم وقدوة.. يا عم هاني شاكر انتا فين من المهزله بتاعت موظفينك؟ لما انت مش فاضي للمنشدين ولا للانشاد  اومال فاضي لايه،  للمهرجانات !هيا مصر بقت بلد المهرجانات؟».

محمود التهامي: مصر بلد الإنشاد مش المهرجانات

وأكد محمود التهامي: «وبناء عليه، أنا طبعا مكمل في هذا الإجراء القانوني، وهاخد حقي بالقانون لأني اللي مايعرفهوش سياده النقيب واللي ميعرفهوش موظفين نقابه المهن الموسيقيه أن مصر بلد الانشاد» .

واختتم التهامي: «هوصلهم رساله، مصر بلد الإنشاد ولينا كرامتنا ولينا وضعنا وحقنا هانعرف تاخده بالقانون، والله قوي جبار لا يرضي بغي الفجار، وسلاح الباطل من ورق، والحق سلاح من نار».

بث مباشر قناة صدى البلد  -  قناة صدى البلد بث مباشر -  2 بث مباشر قناة صدى البلد

محمود التهامي: «المهرجانات وراء انتشار الخمور والبلطجة».. فيديو