مدحت العدل يعلق على تصريحات إلهام شاهين عن الصلاة: الدنيا مش هتتهد

علق الكاتب والسيناريست مدحت العدل، على تصريحات الفنانة إلهام شاهين بشأن صلاة أحمد المخرجين أثناء التصوير.

قال مدحت العدل عبر تصريحات تلفزيونية: «موضوع الصلاة أثناء التصوير بسيط وسهل ولا يحتاج لكل هذا الجدل، الراجل رايح يصلي 5 دقائق الدنيا مش هتتهد يعني، طالما مش هيروح يقعد ساعتين».

تعليق مدحت العدل على تصريحات إلهام شاهين

وتابع: «إحنا بنعمل قضايا من غير قضايا، عايز تروح صلي روح صلي يا سيدي، هنقول لا يعني، ماهو إحنا كلنا مسلمين وبنصلي كلنا في أوقات مختلفة، التصوير بيعطل 20 ألف مرة وبناخد بريك، والموضوع بسيط، لكن في الوضع العام لو بعمل مشهد والممثل منفعل مينفعش أقوله استنى معلش هروح أصلي، أستنى يخلص وروح صلي».

واختتم مدحت العدل: «إحنا بنقعد نخلق قضايا ليس لها معنى لمجرد استعراضها على السوشيال ميديا، اللي عايز يصلي يصلي مش يمكن يدعي والعمل ينجح».

تعرض إلهام شاهين لانتقادات

تعرضت الفنانة إلهام شاهين لحملة من الانتقادات والهجوم خلال الساعات الماضية، بعدما أعيد انتشار فيديو لها وهي تتحدث فيه عن أحد المخرجين الذي كان يترك العمل في أوقات الصلاة.

وقالت إلهام شاهين في الفيديو: «اشتغلت مع أحد المخرجين، كان راجل طبيعي جدًا عادي، فجأة تدين بشكل غريب جدًا، فى كل آذان يسيب التصوير والكاميرا دايرة ويسيب الممثلين، لا وكمان ياخد كل العمال معاه وينزل يصلي».

وأضافت: «خلص المشهد الأول وفي الأوضة بتاعتك صلي لكن تعطل الاستديو كله، ده عمرنا ما كنا بنشوفه، مش توقف الشغل علشان ميعاد الصلاة».

إلهام شاهين