مديحة حمدي: زمان الزوجة كان لازم تكنس بيت حماتها.. فيديو

إسماعيل هاني 23 فبراير 2023 | 06:45 مساءً

تحدثت الفنانة القديرة مديحة حمدي عن زيجات أبنائها وعلاقتها معهم وبكائها ليلة زواج ابنها هي ووالدة زوجة ابنها، والزوجة في البيئات البسيطة وعادات عائلتها في الزواج.

وقالت مديحة حمدي، ببرنامج ساعة زمن المذاع عبر قناة صدى البلد، تقديم الإعلامية مايا الشربيني: لو عندي عزومة في البيت أنا مرتبكش عشان مرات ابني موجودة، وهي عارفة كل حاجة في البيت وعارفة هتعمل ايه، والتقديم نفسه على السفرة هيبقى عامل إزاي، وأنا عرفت أكسبهم ومفيش حاجة بيعملوها ممكن تخليني مش حلوة معاهم، وهم متربيين كويس أوي .

وتابعت مديحة حمدي: فيه تقاليد في عيلتنا في الجواز إن أم العروسة تروح (ترص) حاجات بنتها في شقتها، وأم البنت عليها تملأ التلاجة، وفيه تقاليد كدة في كل أسرة، وأنا كنت بعيط، ودموع الفرح نزلت مني يوم جوازهم، ومنكرش اني بكيت وأم العروسة بكت برضو، لأن الفرحة تهزك.

وأَضافت مديحة: بنات ولادي مبيشتكوش أبدا من أي حاجة، ودول عسل أوي، وبقولهم انتوا كل ما يمر الوقت بتحلووا أكتر، لان طباعهم فيها نضج وجربوا يعني ايه امومة والحياة ممارسة وتثقل المشاعر وتديها خبرات أكتر، والحماة زمان غير، ففي البيئات البسيطة، الحماة كانت زوجة الابن لا تجرؤ انها تعمل بيتها او تطبخ قبل ما تخلص شغل البيت عن حماتها سواء كنس أو مسح أو اي حاجة تتخيليها، واصبح حق مكتسب.. فيه اللي بيتعايش مع الموضوع ده ويتقبله، وفيه واحدة تانية طبيعيتها مش كدة.

مديحة حمدي: زوجي كان مناسب لي ولأولادي

وتابعت مديحة حمدي: زوجي كان مناسب ليا ولأولادي ، وهو من طنطا، كان رايح هو واخوه يعزموا اهل البلد، ويشاء الله انه يعمل حادث وعشان كان بيلعب تجديف فكان بنيانه قوي، والله يرحمه الضلوع اتأثرت بعد الحادث.

مديحة حمدي: حماتي كانت رافضة زواجنا

واستكملت مديحة: حماتي كانت رافضة زواجنا في الأول ولكن بعد ما شفتني واقفة مع ابنها بعد الحادث تغيرت فكرتها عني وقالتلي لو هدور على واحدة تنفع لابني مش هلاقي أحسن منك..وكنت موضع سرها بعد ما عشرتني في الحياة، وكنت بقولها يا ماما.

مديحة حمدي: اللي بيشتريلي حاجاتي سواء لبس أو اكسسوات هم زوجات أبنائي

وأضافت مديحة حمدي: اللي بيشتريلي حاجاتي سواء لبس أو اكسسوات هم زوجات أبنائي، وعلاقتي بيهم جيدة جدا، وأنا عرفت أكسبهم عشان عايزة أبنائي سعداء، وهم متربين كويس، وأنا كنت بعيط يوم زواج أبنائي من الفرحة، واتجوزوا بدري لاننا كنا مرتبين السكن بتاعهم وكانوا متجهزين للزواج، وكان رغبة من والدهم، وأكبر حفيد عندي عنده 20 سنة.