مدير أعمال تامر حسني يتعرض لحادث سير

تعرض تامر يحيى مدير أعمال تامر حسني لحادث سير، وتحطمت سيارته، أثناء عودته من العلمين ظهرًا.

نشر مدير أعمال تامر حسني مجموعة صور وفيديوهات للسيارة بعد الحادث، وظهرت محطمة، وذلك عبر حسابه الشخصي بموقع فيس بوك.

حادث مدير أعمال تامر حسني

كتب مدير أعمال تامر حسني في منشور له: «مفيش كلام ينفع يتقال غير الحمد لله وبشكرك يا رب على كل حال وفي كل حال ومن أجل كل حال وعلى كل تجربة صعبة أنت بتحطني فيها علشان تفكرني دائمًا بوجودك في حياتي و بتكون رسالة سواء أنت بتحبني وبتفديني من حاجه أكبر كان ممكن تحصل ليا».

وتابع: «أو لحد غالي عندي أو بتكون عايز تفكرني أنا فيه خطأ في حياتي محتاج انتبه له وأصلحه والحمد لله أنا عندي إيمان شديد بتجارب ربنا ونعمه الكبيره في حياتي.. أنا و محمد السواق الجميل اللي معايا ربنا نجانا من الموت امبارح في حادثة من أكبر الحوادث اللي عملتها في حياتي».

واستكمل تامر يحيى قائلًا: «وإحنا راجعين امبارح من العلمين الساعه 1:30 ظهرًا فجأه ظهرت عربية نقل قدامه واقفة في نص طريق وادي النطرون في الحارة الثالثة و هو كان قبلها بثواني بيحاول يشغل حاجة في الشاشة اللي قدامه فمكانش في كامل تركيزه على الطريق و ما قدرش يتفاداها.. العربية هربت من موقع الحادث بسرعة علشان عارف طبعًا إنه غلطان وأنا ومحمد ما قدرناش ننزل من العربية غير بعد تقريبًا ربع ساعة علشان الدم كان مغرق العربية».\

حادث تامر يحيى مدير أعمال تامر حسني

وكتب أيضًا: «والمشكلة اللي عقلي مش قادر يستوعبها إنه إزاي مفيش ولا air bag فتحت؟ أنا مش هقدر أعدي الموضوع ده من غير ما ألاقي إجابه فنية ليه لأني لو عرفت إنه ده خطأ فني في اللي برمج السوفت وير أو ركب السينسورز أنا مش هسيبه إلا لما أسجنه لأنه كان حياتي هتنتهي أو أعيش بتشوهات في وشي طول عمري بسبب عدم فتح أي air bag..

أنا حصلي نزيف جامد بسبب كسر في مناخيري وقطع أخذ 8 غرز وقطع داخل الفم أخذ 3 غرز وشرخ في الساق وغالبًا هعمل عمليه في مناخيري بعد 5 أيام».

وأضاف مدير أعمال تامر حسني: «محمد السائق الحمد لله كان حاطط حزام الأمان فربنا أنقذه وكل اللي فيه مجموعه كدمات.. النقل هرب من موقع الحادث وأنا طلبت النجدة والإسعاف 17 مره لكن للأسف كل مره يردوا طالبين مني تحديد موقعي أو أي علامة مميزة في الصحراء وفي طريق صحراوي ودي يعني خليتني أتعصب عليهم لكن مفيش أي حاجه نفعت معاهم..  طلبت من كل اللي كلموني من النجده إانه حد يبعتلي أي رقم تليفون ابعتله عليه لوكيشن وإني بنزف نزيف جامد ومحتاج إسعاف فورًا لكن كان الرد في كل مره لا يا فندم ده مش أوبشن عندنا».

وقال أيضًا: «وقعدت ساعة ونص تقريبًا بدون مساعدة.. ساعة ونصف وأنا بنزف في طريق دولي عدى عليا حوالي أكتر من 500 عربية لكن للأسف ولا عربية فكرت تقف تشوف فيه إيه و غالبًا من بشاعة منظر عربيتي الناس افتكرت إني اللي جواها أكيد ماتو لأنه طبيعي لو أي عربية تانية مش بقوه Range Rover كان استحاله نحرج منها عايشين».

حادث مدير أعمال تامر حسني

نجاة مدير أعمال تامر حسني من حادث سير

وقال: «اه علي فكرة الحادثة كانت الساعه 1:30 الظهر وبعد ما روحت المستشفى في وادي النطرون وبعدها مستشفي زايد التخصصي وبعدها مستشفى الرفيده وخلصت كل حاجة وعدى 8 ساعات لقيت تليفون من النجدة بتاعت طريق العلمين الساعه 9:30 مساءً بيقولي هو حضرتك عملت بلاغ عن حادثة من ساعة في طريق العلمين؟».

واستكمل: «طبعًا لقيت نفسي بمنتهي الاحترام بضحك وبقفل السكه في وشه.. المفروض إنه كان عندي رحلة لأمريكا النهارده لكن طبعًا مش هقدر أسافر لمدة 10 أيام ولغيت كل حاجة وكل الحجوزات والطيران والفنادق وكل حاجة وتم تأجيل كل حاجة لكن برضه الحمد لله.. العربيه دي من يوم ما اشتريتها وأنا شايف حاجات بتحصلي فيها عمري ماشوفتها في 27 سنه شغل وركوب عربيات.. الساحل خلص واللي شايف حياتنا على السوشيال ميديا بس ياريت ييجي يقضي معانا أسبوع بس ويشوف حجم الشغل اللي بنشتغله كل يوم وحجم الضغط النفسي والعصبي اللي إحنا عايشين فيه».

وتابع مدير أعمال تامر حسني قائلًا: «واللي مفيش حد يقدر عليه أو يقدر يستحمله وإني الخروج والسهر والسفر والظهور في المجتمعات والحفلات والسفر الكتير والصور والفيديوهات اللي بتشوفوها وغيره وغيره ده جزء من شغلنا وجزء من حياتنا وجزء صعب قوي قوي قوي وله ضريبة جامدة قوي بندفعها للأسف من وقتنا وفلوسنا وصحتنا وأحيانًا عائلاتنا علشان دي طبيعة شغلنا للأسف اللي بناكل منها عيش مش أكتر».

تامر يحيى مدير أعمال تامر حسني

واختتم: «الحمد لله على كل شئ ويارب ما يوري حد منكم أو حد غالي عليكم اللي أنا شوفته النهاردة.. شكرًا لكل أصحابي اللي وقفوا معايا وساعدوني واهتموا إنهم ينقلوني أفضل مستشفيات علشان أخد أحسن رعاية وغرز تجميل واتطمن على نفسي.. شكرًا هاني هانز وضياء سليمان ودكتور محمود السيد ودكتور أحمد نجم وكل تيم مستشفى الرفيده على  كل حاجة.. شكرًا أخواتي تامر حسني وحسام حسني ورومير على الاهتمام ومتابعة حالتي طول اليوم.. شكرًا عماد نبيل بجد أنت أخ حقيقي على كل اللي عملته معايا النهاردة وخلي بالك من العربية بقي لحد ما تروح لحال سبيلها أو نبيعها خرده علشان أنا مش هركبها تاني وربنا يعوض عليا ويبعد عننا كلنا العين الشريرة.. تاني أنا كويس الحمد لله بس معلش أنا تليفوني قافله كام يوم محتاج فيهم راحة وهدوء».

حادث مدير أعمال تامر حسني

حادث مدير أعمال تامر حسني

حادث مدير أعمال تامر حسني

حادث مدير أعمال تامر حسني