مرتضى منصور يعلن رحيله عن كافة المناصب بالزمالك

أعلن مرتضى منصور، رئيس لجنة الاشتراكات بنادي الزمالك، رحيله عن كل المناصب في النادي، مؤكدًا أن إسعاد الجماهير أهمه منه ومن الكراسي.

قال مرتضى منصور عبر قناته الرسمية على يوتيوب:" في مشكلة كبيرة، أنا جيت اتحاد الكرة النهاردة أشوف مديونية نادي الزمالك، طلعت 63 مليون و 481 الف و 509 جنيه، ومن أجل تقييد القائمة الأولى يجب دفع حوالي 40 مليون، يعني الإجمالي حوالي 104 مليون لاتحاد الكرة".

أضاف:" القيد واقف بسبب الغرامة بتاعت سبورتنج لشبونة حوالي مليون وربعمائة دولار، وأتشيمبونج حوالي 2 مليون".

تابع مرتضى منصور:" حاولت مع اتحاد الكرة علشان نسجل لاعبينا، اتصرفت في  30 مليون، من يتسائل عن فلوس إمام عاشور؟ دخلنا 391 مليون وصرفنا 390 مليون، وفاضل مليون جنيه".

أوضح:" اتصرفت في فلوس علشان نبعت للمدير الفني مستحقاته، جماهير الزمالك من حقها تفرح، وعلشان تفرح لازم تجيب بطولات، وهذا يتطلب شراء لاعبين".

أكد مرتضى منصور:" أخذت قرار.. بقول لـ ممدوح عباس الخناقة إللي بيني وبينك انتهت، مشيت خلاص وأصبحت خارج المشهد ومشجع درجة تالتة، ارفع الحجز عن نادي الزمالك بـ 100 مليون جنيه".

أشار مرتضى منصور:" أمير عمل عقود مع ثلاثة لاعبين، والرابع كان فتوح واتفق خلاص مع خاله، أمير سيسلم العقود والتفويض لأي شخص في المجلس".

أكمل مرتضى منصور:" بقول قدام مصر كلها أنا خارج المشهد، ارفع الحجز، وسايب النادي فيه حوالي 21 مليون جنيه، وبشكر كل اللعيبة الكبار، ماينفعش يا كابتن شيكابالا بعد الماتش تقول عندنا مشاكل، قول المشاكل دي بسبب ممدوح عباس، لكن اللعيبة رجالة كلهم، ودي نوعية اللعيبة إللي الجماهير تريدها".

شدد مرتضى منصور:" أنا سايب النادي ولم أتنازل عن دولار واحد من غرامة كهربا أو أقبل بتقسيطها، تقريبا عليه 2 ونصف مليون دولار، وآخر ميعاد للدفع بكرة إن شاء الله، وإذا لم يدفع سيتم إيقافه، دفع.. يبقى دخلت للنادي 2 ونصف مليون دولار يعني حوالي 100 مليون جنيه، والمحجوز عليه 100 مليون سيحلوا أزمة كبيرة جدا جدا، اللعيبة تأخذ مستحقاتها، واللعيبة الجدد الذين تم التعاقد معهم يأخذوا فلوسهم".

واصل مرتضى منصور:" أتمنى قدام مصر كلها.. أنا خارج نادي الزمالك، سيتم فتح باب الانتخابات 31 أكتوبر، إللي عاوز ينزل الانتخابات يتفضل، لو بصيت لمصلحتي هاقول لا أنا رئيس نادي الزمالك وتم انتخابي أربع أو خمس مرات".

أكد:" لكن أنا شخصيا كمرتضى منصور.. النادي إللي بحبه بينهار، علشان واحد حاجز على النادي إللي بيقول إنه بيحبه، صعقت لما لقيت مبالغ المديونية دي كلها، اتصرفت في جزء من المبلغ، لكن الحمل ثقيل".

أضاف مرتضى منصور:" أنا بعد ماتش النصر مسافر، إن شاء الله حاسس إن ربنا هيكرمنا، لو بتحب النادي والكيان ارفع الحجز وأطالب وزير المالية برفع الحجز عن نادي الزمالك".

تابع:" الانتخابات ستكون على مقعد الرئيس ونائب الرئيس وإثنين من الأعضاء، إللي عاوز ينزل الانتخابات يتفضل، بقول لـ ممدوح عباس الخناقة خلصت خلاص، ارفع الحجز وخلي الـ100 مليون مجلس الإدارة يستلمها من أجل اللاعبين والنادي والجهاز الفني".

أكمل مرتضى منصور:" أتمنى أن الزمالك يصل لنهائي البطولة العربية ويحققوا مبلغ محترم من أجل النادي، سمعت خبر أن الزمالك سيتعاقد مع مدير فني برتغالي، هل هذا يصح قبل ماتش النصر، مفيش برتغالي، والراجل مكمل عقده في الموسم المقبل".

أتم مرتضى منصور:" أخيرا أقول لمجلس الإدارة ناديكم اسمه نادي الوطنية والكرامة، كرامة نادي الزمالك في السماء، يكفي أن الملك فاروق طلب من وزير الداخلية حيدر باشا أن يسمى النادي باسمه الملك فاروق، الوطنية.. رئيس ناديكم طول عمره في ظهر مؤسسات الدولة وسند".