مروة عبد المنعم: ربنا عالم أنا ليه مش محجبة والجنة مش بالشعر

تحدثت الفنانة مروة عبد المنعم عن رأيها في الحجاب، خاصة بعد ارتداء ا ابنتها حور الحجاب وتعرضها للانتقادات، معلقة: «جات لي فكرة الحجاب في نفس سن بنتي وكنت في أولى إعدادي».

وتابعت مروة عبد المنعم حديثها عن الحجاب: «وقلت لماما قالت لي لما تكبري خدي القرار، كنت ساعتها عايشة روحانيات الحجاب خاصة أني كنت عايشة في السعودية.. أنا مقتنعة جدًا بالحجاب وربنا عالم أنا ليه مش محجبة».

تصريحات مروة عبد المنعم

واستكملت: «وده حساب بيني وبين ربنا، وفخورة جدًا ببنتي وأتمنى ربنا يثبتها على الحجاب، ولو جه عليها فترة وزهقت وخدت قرار تخلع الحجاب مش هقف ضدها.. أنا بيني وبين ربنا عمار كبير جدًا، وواثقة في ربنا وكرمه وحبه ليا وواثقة أنه بيحبني جدًا وبيبعت لي رسايل كتير وبيكلمني كتير».

وقالت مروة عبد المنعم أيضًا: «أنا بقرأ رسايل ربنا ليا، ومؤمنة إني في الجنة مش بالشعر نهائي، وأنا أخلاقيًا الناس كلها عارفة أخلاقياتي ومش محتاجة أني أتكلم عنها ودينيًا ربنا وحده بس اللي عارف بيني وبينه إيه».

مروة عبد المنعم وابنتها

حجاب ابنة مروة عبد المنعم

وفيما يخص حجاب ابنتها، علقت قائلة: «اعترضت في البداية لأني عارفة دماغ بنتي لأنها أبعد ما تكون عن الحجاب، لأن حور بتحب الحياة وعاوزة تعيش وتلبس وكنت بتخانق معاها أن لبسها قصير، وفجأة قلت لها أنتي هتتحجبي فعلًا ده قرار صعب، قالت لي ماما أنا مخضوضة ما تخوفنيش».

وأضافت الفنانة مروة عبد المنعم: «قلت لها خدي القرار زي ما أنتي عاوزة، وهي دايمًا كده في قرارتها لما تكون عاوزة الحاجة لازم تحصل.. حبيت فكرة تصوير الفيديو لأني بشوف بنات بتتحجب وبيعملوا كده مع أهاليهم، وكان مهم أعرف رد فعل كل عائلتي، وكلهم ما تخيلوش أن حور ممكن تتحجب».

وردت على انتقادات اعتراضها على حجاب ابنتها، قائلة: «كل واحد أدرى ببيته، الناس علشان بقول لها إيه الهبل ده، قالوا أنتي بتقولي على الحجاب هبل، يا جماعة ده طبيعي حوار بيني وبين بنتي، مش عبط على الحجاب».

تصريحات ابنة مروة عبد المنعم

ومن جانبها، قالت حور ابنة مروة عبد المنعم: «مفيش حد من صحابي محجب يمكن اتنين تلاتة، وقبلها بيوم صحابي كانوا بيتكلموا في موضوع الحجاب وقلت لهم إني مش بفكر فيه وتاني يوم فاجئتهم».

واختتمت: «وكل الناس مقتنعة إني هقلع الحجاب في الصيف لكني مش هعمل كده.. وعدم حجاب والدتي ده قرار شخصي وحاجة بينها وبين ربنا، ومش المفروض أي حد يقولها أتحجبي أو لأ، دي حاجة المفروض تكون مقتنعة بيها».

مروة عبد المنعم