مسلم: عمرو دياب صوته مش قوي ومش شايف نفسي بين مطربي المهرجانات

كشف مسلم مطرب المهرجانات أسرار من مسيرته الفنية، بجانب رأيه في مقارنته مع عدد من مطربي المهرجانات الآخرين.

قال مسلم عبر تصريحات تلفزيونية: «أغنية يا أصفر كانت من وحي خيالي وكان فيه مشكلة ساعتها معايا، وهي سبحان الله نجحت، وغنيتها لواحد كان صديقي جدًا، ودلوقتي حبيبي وبموت فيه، وهو حودة بندق وهو دلوقتي أخويا، كانت مشكلة وإحنا صغيرين وهو طالع من قبلي ومن الناس اللي شقيت».

مسلم وحودة بندق

وتابع: «لما اتشهرنا مع بعض حصلتلنا عين بعدتنا عن بعض، فاستفزني بالكلام رُحت رديت عليه بالشغل وغنيتهاله، واتحسدنا لأننا نجحنا مع بعض كتير زي أغنية خطر جايبة 140 مليون وعاملين ألبوم مكسر مصر أما المقارنة بيني وبين عصام صاصا وحودة بندق، كل واحد ناجح في حتته وأنا مش شايف نفسي مع دول».

واستكمل مسلم حديثه عن مقارنته مع مطربي المهرجانات، قائلًا: «مش معنى كده إنهم وحشين، أنا صنعت حتة ليا، أنا مش شايف منافس ليا، ولما بغني مع أي حد بحط حتتي، ودي أجمل حاجة بعملها مش عايز أنافس غير نفسي».

مسلم

تصريحات مسلم

وأضاف: «وفيه أعلى من عمرو دياب، وحسين الجسمي أعلى واحد في العالم بالنسبة لي، وعمرو دياب 40 سنة على القمة عشان تقيل ومختفي دايمًا، نفسي أتميز زي سعد لمجرد لأنه سكتي، وعمرو دياب مش محتاج حد يقلده لأن صوته عادي، ومش قوي صوتيًا لكن تسمعه تحبه، أما أنا الاتنين».

وقال مسلم أيضًا: «لو ربنا كرمني ووقفت قدامه هنشوف الحتة دي، لأن هيبقى رأي الناس، وأنا 23 سنة وعامل كدة ما بالك لو 30 سنة هوصل لفين».

أسرار مسلم

وكشف تفاصيل موقف محرج تعرض له من قبل بسبب المنتج أحمد السبكي، قائلًا: «كنت صغير ونزلت القاهرة رحت للسبكي، دخلت سلمت عليه ورفض السلام، وبصلي من فوق لتحت وقالي يالا يابني على اسكندرية مبنساعدش حد هنا، ومشيت من الدقي لصلاح سالم بعيط ومنهار».

واختتم: «لكن بشكره دلوقتي لأنه إداني طاقة وغل للشغل، ووصلت للي بحلم بيه بس عمري ما أنسى الموقف ده، وطلب اشتغل معاه في حاجة ورفضت، وابنه كريم صاحبي وعندي أغنية في فيلم شقو، وفيه دور جايلي وفيه نجوم كبيرة زي ماجد الكدواني وعمرو عبد الجليل».

مسلم